Претходен број

Турција ja сака Македонија под чадорот на НАТО

Претседателот на Собранието на Турција, Ќоксал Топтан, испрати силни пораки за поддршка

Оливера Војновска

„Турција е голем и искрен пријател на Македонија и поддржувач во нејзините евроатлантски аспирации. Македонија повеќе од потребното ги исполни критериумите за членство во НАТО, недобивањето покана го чувствуваме како голема неправда и тоа беше големо разочарување за нас. Неприфаќањето на Македонија во НАТО фрли сенка врз почитувањето на земјите кон Алијансата. Многу е значајно Македонија да биде под чадорот на НАТО, најсилен безбедносен систем во светот. Членството во НАТО и безбедноста на Македонија се важни за регионот и секаков негативен развој на настаните на овие простори ќе има негативно влијание кон сите земји. Како што заслужи да го заземе своето место во НАТО, така Македонија има заедничка иднина и со ЕУ. Многу значајно е тоа што огромен број државјани на Македонија даваат поддршка за зачленување на земјата во овие институции. Се надевам дека НАТО и ЕУ соодветно ќе го вреднуваат тоа“. Ваква силна порака до македонските граѓани вчера испрати претседателот на Големото национално собрание на Турција, Ќоксал Топтан, во своето обраќање во парламентот.

Во иста интонација беше и изјавата што ја даде потоа за медиумите по средбата со спикерот Трајко Велјаноски. Како што соопшти Кабинетот на претседателот Бранко Црвенковски, безрезервна поддршка за НАТО била искажана и во разговорите со шефот на државата.

Топтан во својот говор во Собранието изрази задоволство за тоа што политичките односи меѓу двете земји од ден на ден се' повеќе се зацврстуваат. „За време на мојата посета, уште еднаш се уверив во тоа колку е силно пријателството помеѓу Македонија и Турција и колку се интензивни и искрени нашите односи. Македонија за нас е пријателска земја со која сме длабоко поврзани - со нашите меѓучовечки односи, културата и минатото. Показател за љубовта што ја чувствува турскиот народ спрема Македонија е тоа што 369 од 564 пратеници во турското Собрание се членови на парламентарната група за пријателство со Македонија“, рече Топтан.

Со многу внимателен пристап, тој спомна дека принципот на правична застапеност на етничките заедници е исклучително важен, но нагласи дека „преземањето соодветни мерки за реализирање на ова е во надлежност на Македонија“.

Неговиот домаќин, спикерот Велјаноски, во изјавата за медиумите рече дека Турција е една од најпријателските држави на нашата земја. „Многу го почитуваме тоа што припадниците на турската заедница во Македонија се најлојалните граѓани и тоа никогаш не било доведено во прашање“, изјави рече Велјаноски. Тој истакна дека Македонија презема одредени законски мерки во однос на припадниците на помалите етнички заедници.

Настапот на Топтан во парламентот од собраниската галерија го следеа претставници на дипломатскиот кор. Сепак, во собраниската сала не беа присутни сите 120 пратеници, имаше околу 80-ина. Празни столчиња имаше и кај власта и од опозицијата, а некои пратенички групи отсуствуваа комплетно (ЛДП - Нова алтернатива и тројцата пратеници од Нова демократија).

Од Кабинетот на претседателот соопштија дека Црвенковски и Топтан на средбата констатирале дека „Македонија и Турција имаат одлични односи што се остваруваат со постојана комуникација на највисоко ниво“.

Македонскиот претседател изразил надеж дека одличните политички односи и сестраната соработка ќе достигнат адекватно ниво и во економијата.

Топтан ја предводи турската делегација во неколкудневна официјална посета на нашата земја и е прв странски политичар кој се обратил во овој собраниски состав. Во минатиот парламент имаше пет настапи на странски политичари.