Во Виница ќе се произведуваат полиетиленски производи

Изградбата на фабриката е заедничка македонско-словенечка инвестиција

Иван Бојаџиски


Штип - Викендов во Виница беше предадена во употреба фабрика за полиетиленски производи „Рото М“ како дел од познатата словенечка компанија „Рото груп“. Во изградбата и опремувањето на новиот стопански субјект се вложени 500.000 евра, капитал во кој словенечката компанија учествува со 80 проценти, а виничкиот бизнисмен Зоран Ефремов со 20 проценти. На свеченоста на која присуствуваа деловни луѓе од Словенија, Турција, Србија, Грција, Бугарија и од Косово, говореа Зоран Ефремов, генерален директор и сопственик на „Рото груп“, Штефан Певлинек, и вицепремиерот Владимир Пешевски.

Според Ефремов, новата фабрика во Виница е единствената фирма во Македонија која произведува над 250 вида производи од полиетилен според ротомулдинг-технологија. „Веќе имаме договори за пласман на нашите производи и на пазарите во Грција, Албанија, Косово, Бугарија, Турција и во Израел, а наша стратегиска цел е да бидеме присутни и на пазарите во Русија и во Сирија, за што веќе преговараме. Дел од нашето производство ќе оди и за Словенија, Србија и Хрватска“, рече Ефремов.

Моментно во фабриката се вработени дваесет лица, а со заокружувањето на трите фази таа бројка ќе се зголеми на 35. Процесот на производството е целосно автоматизиран.

Според Штефан Павлинек, изградбата на фабриката во Виница е логична последица на развојната филозофија на компанијата „Рото груп“. „Имаме фабрики во Словенија, Србија, Хрватска и во Словачка, а од денес имаме фабрика и во Македонија. Ова е одлична локација за нашата фабрика со оглед на фактот дека овој крај е во близина на Бугарија од каде што има одлични врски со Турција, а тие пазари ни се мошне важни“, рече Павлинек. Тој ги пофали партнерите од Виница, како и вработените за кои искажа највисоки оценки.

Производството на полиетиленски производи во Виница го започна бизнисменот Ефремов во мал погон со само тројца вработени кој стартуваше во 2004 година.