„Проаква“ ќе ги наплаќа долговите со полиција

Струга - МЈП „Проаква“ ќе ги наплаќа сметките за вода од жителите на Струга со помош на полицијата, но и од останатите субјекти од овој град  кои со години одбиваат да ги платат сметките за вода, најави директорот на „Проаква“, Бранислав Трпчевски. Toj информира дека ќе бидат поднесени кривични пријави за сите оние што оневозможуваат вработените во „Проаква“ без пречки да си ги извршуваат задачите.

„Оваа мерка досега не ја користевме, но во наредниот период по наше барање ќе ја користиме како асистенција полицијата, бидејќи се соочуваме со радикални отпори од страна на поединци“, рече директорот Трпчевски.

Според него, хотелските капацитети и подрачните единици на министерства во Струга, остануваат најголеми должници на „Проаква“. По основа на ненаплатени сметки за вода, „Проаква“ има побарувања од 2 милиона евра од граѓаните, а од правните субјекти повеќе од 1 милион евра.  (МИА)