Електронска распределба на 41 стан во Аеродром

Министерството за транспорт и врски викендов организираше јавна електронска распределба на 41 стан во Скопје во станбена зграда во Реонски центар во општина Аеродром. Становите им се продаваат на млади брачни двојки и самохрани родители по огласот што беше објавен на 7 мај годинава.

Министерот за транспорт и врски Миле Јанакиевски, кој присуствуваше на распределбата на становите нагласи дека со ваквиот начин на распределба сигурно ќе добијат оние лица на кои им е најпотребен. Тој ги повика незадоволните од распределбата на становите в среда во ресорното Министерство да извршат увид во својата и во документацијата на добитниците на станови.

"Компјутерот не признава ниту партиска, ниту роднинска припадност. Ова е најефикасен начин за распределба на становите. Ако сте еден од тие што немаат комплетни документи, тогаш ќе можете при повторната апликација да ги комплетирате документите", повика Јанакиевски.

Тој информира дека веќе е објавен нов оглас за нови 56 стана, а до крајот на 2012 година во Скопје, Охрид и во Велес ќе бидат изградени уште три згради со 139 станови наменети за продажба за млади брачни двојки и самохрани родители.

Прелиминарна распределба на социјални станови што ги гради државата вчера имаше во Крива Паланка, каде што за 46 стана пристигнале 113 апликации, и во Кочани, каде што за 29 стана има 69 апликации.

Распределба на социјални станови завчера беше извршена во Охрид и во Кичево, а денеска покрај во Скопје ќе има и во Кавадарци.

За 208 социјални станови во сите пет града пристигнати се 547 апликации. (МИА)