Словенците ги скршија Србите, Полска ја изненади Литванија

Домаќинот на Евробаскетот, кошаркарите на Полска, ја остварија и втората победа во групата Д, која се игра во Вроцлав. Во вторникот Полска одигра извонреден натпревар и ја совлада Литванија со 86:75. Двата полски центри, Лампе и Гортат, ја пробија одбраната на Литванија, и заедно постигнаа 37 коша, но остварија и 27 скока, од тоа Гортат 17.

Сепак, најдобар стрелец кај Полјаците беше Дејвид Логан со 19 поени, а домаќинот во последниот меч во групата против Турција ќе бараат можност да завршат на првото место.

Србија во првиот меч ја фрли Шпанија на колена, но во вториот „клинците“ на Ивковиќ потклекнаа против Словенија (80:69). Против Шпанците одлично функционираше центарската врска Крстиќ - Перовиќ, но тие против Словенија беа апсолутно незабележителни. Боштјан Нагбар ја водеше Словенија до успехот со 17 поени и 9 скока, додека Лаковиќ и Драгиќ додадоа по 16. Кај Србите само Теодосиќ со 14 поени заврши со двоцифрена бројка погодоци.

Големо изненадување во групата Б во Гдањск направија кошаркарите на Германија кои ги совладаа Русите со 76:73. Германскиот состав го предводеше Јан Хендрик Јагла со 19 поени и 11 скока.