Марин Чилиќ го прегази Енди Мареј

Марин Чилиќ по извонредна игра го совлада вториот светски рекет во три сета со 7:5, 6:2 и 6:2

Марин Чилиќ можеби имал подобри мечеви во кои неговата игра делувала поспектакуларно, но никогаш не одиграл попаметен меч. Само така можеше во три сета (7:5, 6:2, 6:2) да го совлада Енди Мареј, 2. светски тенисер, човекот со најдобар скор на тврда подлога во 2009 година - 37:3.

Двобојот со Мареј можеше да биде уште една типична приказна за Хрватот Чилиќ, приказна во која бил блиску до победата и повторно останал со празни раце во меч против врвен соперник, ако Британецот во првиот сет при 5:4 искористеше една од двете сет-топки (15:40). Меѓутоа, ас-сервисот и добро замислениот напад го спасија Чилиќ од тие грижи и го стави во погон системот кој веќе не можеше да се сопре.

Комбинацијата од лошото издание на Мареј и одличниот Чилиќ и не можеше да произведе друг епилог во овој меч. Дури кога заостануваше еден брејк во третиот сет, при водството на Чилиќ од 3:2, Мареј покажа знаци на живот, но Чилиќ се потруди да ја „убие“ таа краткотрајна промена на расположението на Шкотот. Немоќ е зборот кој најдобро го опишува расположението на Мареј. Немоќ нешто да промени со тенисот кој го играше во вторникот. При прославата на победата Чилиќ не делуваше како човек кој ја завршил мисијата. Денес во четврт-финалето го очекува нов предизвик во името на Аргентинецот Хуан Мартин дел Потро, кој му е должник уште од Австралија-опен.

Во последниот меч од четвртото коло третиот носител, Шпанецот Рафаел Надал го победи 13. носител Французинот Гај Монфилс со 6:7, 6:3, 6:1 и 6:3 и се пласира во четврт-финалето каде го очекува Чилеанецот Фернандо Гонзалес кој пак, во осминафиналето го совлада Жо Филфред Цонга.

На женскиот дел од турнирот на УС-опен први две полуфиналистки се Серена Вилијамс и Ким Клајстерс. Американката во четврт-финалето ја совлада Италијанката Флавија Пенета со 6:4 и 6:3, додека Белгијката Ким Клајстерс славеше против Кинеската На Ли со 6:2 и 6:4.

Резултати: Осминафинале, тенисери: Хуан дел Потро - Карлос Фереро 6:3, 6:3, 6:3, Гонзалес - Цонга 3:6, 6:3, 7:6 6:4, Чилиќ - Мареј 7:5, 6:2, 6:2, Надал - Монфилс 6:7 (3), 6:3, 6:1, 6:3.

Тенисерки, четврт-финале: С. Вилијамс - Пенета 6:4, 6:3, Клајстерс - На Ли 6:2, 6:4.