Претходен број

Политиката ги здроби учениците во Струга

ДПА обвинува дека зад барањето за приватно средно училиште „Јуропиан скул“ стои градоначалникот Мерко

Симон Илиевски

Струга - По вчерашните обвинувања на струшкиот разгранок на ДПА дека градоначалникот Рамиз Мерко од ДУИ ќе отвора приватно средно училиште, наместо да се решава, случајот во средните училишта во Струга дополнително се политизира и комплицира.

Паралелно, работната група на Општинскиот совет за превенција со помош на двајца медијатори на ОБСЕ прави напори да ги врати учениците-Македонци на настава. Вчера учениците-Македонци продолжија со бојкот на наставата во средното училиште „Нико Нестор“, а на настава беа во Гимназијата „Ибрахим Темо“ каде што наставниот процес се одвива во етнички мешани смени. Во локалната власт се надеваат дека по најавените средби на медијаторите со Училишниот совет и Советот на родители, за два до три дена учениците- Македонци ќе се вратат на настава.

Од струшкиот разгранок на ДПА вчера го презентираа барањето за отворање приватно средно училиште „Јуропиан скул“ кое било на дневен ред на владина седница, но не било расправано за него тврдејќи дека зад тоа стои градоначалникот Мерко.

Тој ги отфрла обвинувањата велејќи дека тоа се политички инсинуации пред претстојните локални и претседателски избори и дека тој се залага за отворање на какви било образовни институции. Според првиот човек на ДПА од Струга и кандидат за градоначалник, Менди Ќура, барањето за отворање приватно училиште било на дневен ред на Владата на17 февруари годинава и дека зад барањето, според него, стои актуелниот градоначалник Рамиз Мерко. Тој го обвини Мерко дека со отворањето приватно средно училиште се комплицира состојбата во постојните средни училишта и дека зад сето тоа има политичка заднина.

Оптимистички најави дека средношколците-Македонци, кои веќе трета недела ја бојкотираат наставата, ќе се вратат и во средното училиште „Нико Нестор“ доаѓаат од струшката локална самоуправа. „Очекуваме дека со посредство на медијаторите на ОБСЕ состојбата ќе се релаксира и преку средби со учениците-Македонци, нивните родители, наставниците и органите на училиштето, за неколку дена напнатоста ќе се надмине и учениците ќе се вратат на настава“, вели Џејми Хајредини, раководител на Секторот за образование во локалната самоуправа во Струга.

Најавите за брзо решавање на проблемот со бојкотот на наставата на учениците-Македонци во „Нико Нестор“ и барањето посебни етнички смени позитивно се коментираат во Струга, но ретко кој е убеден дека тоа брзо ќе се реши. Неофицијално се слуша дека барањата на учениците- Македонци се' уште се актуелни и дека тешко ќе се најде решение без целосно вклучување на највисоките државни органи, чии претставници неколку пати беа во Струга, па потоа се откажаа и решавањето на проблемите го оставија на работната група на Советот за превенција, зајакнат со двајца медијатори на ОБСЕ.