Изложба од Школата за цртан и анимиран филм во Карпош

Трудови на 25 ученици од трето до осмо одделение од повеќе основни училишта на територијата на општина Карпош се претставени на втората изложба од работилницата за цртан и анимиран филм. Изложбата што се одржува во библиотеката „Другарче“ ја организира Детскиот ликовен центар со финансиска поддршка на Општина Карпош, кои ја посетуваа оваа школа. Покрај многубројните цртежи на децата што ја посетуваа школата, на изложбата беа презентирани и 20-ина видеоинсерти изработени со компјутерска техника и тоа во флеш-анимација.

Градоначалникот на Карпош, Стевчо Јакимовски, на учесниците им додели дипломи, а дипломи добија и училиштата и менторите по ликовно воспитание што ги поттикнаа учениците да бидат дел од работилницата. Главниот раководител и предавач на работилницата проф. Илчо Симовски најави дека следната година со учениците од третиот степен на оваа работилница ќе излезат со целосен цртан триминутен анимиран филм што ќе биде во продукција на самата работилница. (С.Р.)