Десет години „Макавеј“

Во рамките на Саемот на книгата издавачката куќа „Макавеј“ одбележа 10 години постоење. Издавачот „Макавеј“ веќе десетта година уверливо ги афирмира најистакнатите авторски пројави во македонскиот книжевен и културен простор. Освен тоа таа афирмира и преводна литература на македонски јазик, како и дела од македонската литература на други јазици. Во сите години од постоењето тие покажуваат посебна грижа за македонските млади автори, а со афирмираните творци поети, прозаисти, научници и преведувачи постигнуваат високи дострели во одделни области. Така, романот „Нишан“ од Блаже Миневски ги освои наградите: „Роман на годината“ на „Утрински весник“ и наградата „Стале Попов“, поетските книги „Штит“ од Радован Павловски, „Столисник“ од Вена Ацевска и „Големата љубовна песна“ од Братислав Ташковски ја освоија наградата „Браќа Миладиновци“, книгата „Вечноста и мигот“ од Бранко Цветкоски – наградата „Димитар Митрев“, а поетските дела на Ристо Јачев, Јордан Даниловски, Иван Чаповски, академик Катица Ќулавкова, Трајан Петровски и други се постојани автори на едицијата за македонската современа поезија.

Секоја издавачка сезона, „Макавеј“ води грижа и застапува во својата едиција за преводи видни светски, балкански и домашни автори од немакедонска националност. Во изминатите сезони објавија преводи на врвни дела од Васко Попа, Назим Хикмет, Владо Даверов, Костас Валетас, Новица Тадиќ, Марко Семов, како и од македонските поети од другите етникуми – ак. Луан Старова, Илхами Емин, Ким Мехмети, Фахри Али, Нехас Сопај, Линдита Ахмети и др.

Владимир Цветкоски, уредник во „Макавеј“ по повод јубилејот ни изјави:„По десет години постоење, и по 300 објавени наслови од домашната и светска творечка и научна мисла, можам да кажам дека сепак, останува уште многу да се поработи врз некои одделни аспекти од работата на ’Макавеј‘. Ако во изминатиот период прележу��авме разни ‘детски болести’, во наредниот период треба да дадеме се' од себе да растеме и да се развиваме. Од името на сите во Макавеј им благодарам на нашите автори и на медиумите за конструктувната соработка. Нашата десетгодишнина е убав повод да ги поканам сите наши автори, преведувачи, читатели и пријатели да не' посетат на нашиот штанд на годинашниот саем на книгата.“ (Н.П.)