Црвенковски бара предвремени избори

Повик до парламентарните партии од власта, со забрзана процедура да ги донесат измените во Изборниот закон

Иван Бојаџиски


ШТИП - „Почнуваме битка за предвремени парламентарни избори. Првиот чекор ќе го преземеме по самитот на ЕУ, на 16 декември, кога во Собранието на Македонија ќе поднесеме иницијатива за гласање недоверба на Владата“. Ова го најави Бранко Црвенковски на прексиноќешниот митинг во Штип, еден од најмасовните на опозициската СДСМ, на кој, според некои процени, присуствуваа околу 10.000 граѓани од изборната единица „три“. Црвенковски ги повика парламентарните партии, а пред се', оние од власта, во следните два месеца со забрзана процедура да ги донесат измените во Изборниот закон и да се прочисти гласачкиот список со што ќе се создадат услови за фер и демократски избори.

Лидерот на СДСМ вчера ја критикуваше владејачката гарнитура на чело со премиерот Никола Груевски, која многу ветувала, а малку остварила.

„Ветуваа дека ќе не' внесат во НАТО и во ЕУ. Пет години поминаа, пет сантиметри не не' поместија. Сите околу нас напредуваат, само ние стоиме во место и пропаѓаме. Од Владата на Груевски објаснуваат дека тоа е само поради спорот со Грција, ама никогаш не и' соопштија на јавноста како беше можно, кога ние, предавниците, според нив, ја водевме земјата, да напредуваме и кон НАТО и кон ЕУ. А откако дојдоа тие, самопрогласени патриоти, на тој пат се' да се блокира. Како беше можно во 1995 година да станеме членка на Партнерството за мир, во 2001 година да ја потпишеме спогодбата за стабилизација и асоцијација со ЕУ, две години потоа да станеме членка на Јадранската група, а во 2005 година да стекнеме статус на земја-кандидат за членство во ЕУ без каква било блокада од Грција“, праша Црвенковски.

Тој нагласи дека наместо слобода и демократија, правда и достоинство, луѓето не смеат да го кажат своето мислење. „Стопанствениците се плашат од инспекции, полиција, од затворање на фирмите“, рече лидерот на СДСМ. Притоа нагласи дека од ветените инвестиции од 8,5 милијарди евра за седум години досега нема ни едно евро.

Црвенковски нагласи дека власта се слика на телевизија, сече ленти, става камен-темелници. „Французи ќе правеле автомобилски делови, Кинези ќе произведувале телевизори, Американци со каубојски шешири ќе отворале сточарски фарми, Турци стаклена амбалажа, Израелци ќе граделе сончеви градови и трговски центри, Германци хидроцентрали... Десетина пати најавуваа изградба на хотели во Скопје, Охрид. И тоа не кој било, туку ’Радисон’, ’Шератон’, ’Хилтон’, ’Мериот’... И, што од сето тоа? Најреномирани инвеститори, купувачи на државно земјиште, и тоа по евро за квадратен метар се Мане - ‘Левис‘, Пеце Наумовски, Мите - ‘Макоил‘, Столе - ‘Воденица‘, Орце Камчев. Се' фирма до фирма, се' бренд до бренд. Нема ништо ниту од ветувањето дека Македонија ќе ја направат големо градилиште. За пет години не направија километар автопат. Сега под концесија на странци ќе го даваат тоа што ние го изградивме од Градско до Демир Капија, од Скопје до Тетово и Гостивар, обиколницата околу Скопје“, истакна Црвенковски.

Од завчершаниот митинг тој праша каде се штипскиот аеродром и новиот автопат со кој истокот ќе се поврзеше со Велес и Скопје, кои фабрики ќе ги донесе Владата на Груевски во индустриската зона во Штип, каде се новите работни места?