Претходен број

Гази Баба исплатила 3,7 милиони денари за надоместоци на советниците

Ревизорскиот извештај констатирал објективни финансиски извештаи за донации

Општина Гази Баба за 2007 година прикажала ставка за плати и надоместоци на приходи и расходи поголема за 3.725.000 денари поради исплата на надоместоци за советниците и за претседателот за присуство на седници, за учество во работни тела, за проучување материјали, и слично. Општината, по основа на донации од АД „Скопски саем“ остварила приход од 30 илјади денари, а од спонзорство од „Лукоил“ во Скопје 50 илјади денари, за што нема склучено договори за донација и спонзорство. Ова е наведено во ревизорскиот извештај за работењето на Општина Гази Баба за 2007 година во време кога градоначалник е Коце Трајановски. Сепак, ревизорот констатирал дека финансиските извештаи вистинито и објективно ја прикажуваат состојбата на сметката за донации на 31 декември 2007 година.

Во извештајот се вели и дека Гази Баба не ги применувала ниту одредбите од Законот за јавни набавки, кога изградила влезен хол за едношалтерски систем, бидејќи без постапка за јавна набавка склучила договор на износ од еден милион денари. Ревизорот нашол и неправилна примена на акти, а Гази Баба не ја почитувала ниту процедурата за издавање одобренија за користење јавни пешачки површини пред деловните објекти за поставување урбана опрема. Не бил донесен ниту интерен акт за дефинирање на постапката за утврдување комунална такса за користење јавни површини и не било задолжено лице за извршување на овие активности. Општината е тужена во повеќе судски спорови во вкупен износ од 12.830.000 денари. (Сн.К.)