Канадскиот премиер во кавга со САД
Отава- Канадскиот премиер Стивен Харпер остро ја критикуваше американската економска политика на последните дебати пред предвремените избори во Канада на 14 октомври.
Харпер врати остро на обвиненијата на четворицата опозициски лидери, дека е канадски „клон“ на Џорџ Буш.
„Не ја следиме истата политика како САД“, рече Харпер. „Економскиот и финансискиот метеж во САД е катастрофален - политиката на Вашингтон беше неодговорна“, додаде тој.
Канадскиот премиер призна дека дозволил грешка, кога како дел од опозицијата побарал Канада да учествува во војната во Ирак.
„ Канаѓаните не се загрижени за своите работни места или оти можат да ги загубат домовите. Тие стравуваат за проблемите на финансиските пазари“, рече тој, алудирајќи на намалувањето на заштедите и на пензиските фондови поради крахот на финансиските пазари.
Берзата во Торонто вчера затвори со пад од седум проценти во очекување на гласањето на Претставничкиот дом во САД за планот за спас на американскиот финансиски систем.
Харпер призна оти има забавување во канадската економија, но не и рецесија и за разлика од САД земјата избегнала банкарска криза.
Опозицијата го обвини Харпер дека не ја сфаќа сериозно ситуацијата со забавувањето на економијата во земјата.
На 7 септември премиерот Стивен Харпер го распушти Домот на општините и свика предвремени парламентарни избори. Харпер се надева неговата Конзервативна партија да ги зголеми местата во парламентот. Според проучувањата на јавното мислење, конзервативците можат да освојат мнозинство. (МИА) |
