Секој месец се' поскапо

Во јуни домашните статистичари пресметале инфлација од 1,8 отсто

Најпосле и статистичките бројки го покажаа она што го чувствуваат македонските граѓани веќе неколку месеци, а тоа се зголемените цени на речиси сите производи, пред се', на основните прехранбени продукти. Па така, домашните статистичари во јуни оваа година измериле инфлација од 1,8 отсто, односно за толку пораснале трошоците на живот во однос на истиот месец минатата година. Тоа не е некој драматичен скок на инфлацијата, но покажува дека трошоците за живот полека, но сигурно растат секој месец со се' посилно темпо.

Ова е доказ дека постојаното поскапување на енергенсите на светскиот и на домашниот пазар почнува да си го зема својот данок. Повисоките цени на бензините, струјата и на другите енергенси неминовно доведоа до нагорни корекции кај цените и на сите други производи. Конкретен пример за загризувањето на инфлацијата беше неодамнешното поскапување на лебот, што се случи во речиси сите пекарници во земјава.

Во мај инфлацијата била прилично ниска и изнесувала 0,2 отсто, во април таа била 1,4 проценти, во март изнесувала 0,7 отсто, во февруари била 0,6 проценти, а во јануари нејзиното ниво било многу ниско, само 0,1 отсто.

Во јуни во споредба со истиот месец лани цените на мало пораснале за 2,5 проценти.

Во јуни, пак, во однос на мај годинава, трошоците на живот покажале раст од 0,2 отсто, а цените на мало се на истото ниво.

Порастот на трошоците на животот од 0,2 процента е резултат на повисоките индекси на овошјето за 25 отсто, рибата за 0,8 проценти, производите од жито и преработките од месо за 0,6 отсто, преработките од риба за 0,3 проценти, сувото овошје, другите прехранбени производи и алкохолните пијалаци за 0,2 отсто и свежото и киселото млеко за 0,1 проценти. Пораст на индексите на трошоците на животот е забележан и кај ПТТ-услугите за 3,8 проценти, услугите за образование и развој за 0,8 отсто, храната во ресторани и хотели за 0,7отсто, туристичките аранжмани за 0,3 проценти и превозот на патници за 0,2 отсто.

Намалување на индексот на трошоците на животот во јуни 2010 година, во споредба со јуни, е забележано кај зеленчукот за 5,9 проценти, јајцата за 3,1 отсто, млечните производи за 0,7 отсто и преработеното овошје за 0,1 процент. Намалување на индексот е забележано и кај нафтените деривати за 2,4 отсто, средствата за образование за 1,2 отсто, сообраќајните средства за 0,7 проценти и трошоците за одржување на автомобилите за 0,1 отсто.

На ниво од претходниот месец останаа индексите на групите облека и обувки, домување, хигиена и здравје и останати услуги. Вредноста на потрошувачката кошница за исхрана и пијалаци за едно четиричлено домаќинство, пресметана врз основа на цените на мало, во јуни 2010 година изнесува 12.170 денари и во однос на претходниот месец е пониска за 1,7 отсто. (Н.Н.Ф.)