За името повторно се разговара во Брисел

Средбата Груевски - Папандреу е политичка порака дека постои расположение за решение за името, вели Милошоски

Македонскиот и грчкиот премиер вчера попладне требаше да се сретнат во Брисел, првпат откако и двајцата ја добија довербата - Никола Груевски од народот, а Јоргос Папандреу од парламентарците за формирање нови влади и продолжување на нивната политика во водењето на земјите. Со новите мандати за влади што ги добија двајцата премиери добија и зелено светло да продолжат во спроведувањето на политиката што ја имаат за прашањето околу името и за градењето на меѓусебните односи. Средбата, која беше најавена за вчера попладне, македонскиот министер за надворешни работи Антонио Милошоски како дел од македонската делегација, изјави дека „средбата со грчкиот премиер е одлична политичка порака дека постои расположение од двете страни за изнаоѓање решение за спорот со името“.

Груевски за спорот за името разговарал и на вчерашната средба со еврокомесарот Штефан Филе, кого го информирал дека новата влада има силна волја и посветеност за решавање на деценискиот спор со Грција. Филе му го повторил ставот на ЕУ на Груевски дека решавањето на спорот за името останува суштинско прашање. Тој нагласил дека двете страни треба да се ангажираат или под покровителство на ОН или, пак, преку директни разговори за решавање на спорот.

Филе на средбата на Груевски му ја пренел пораката дека Европската комисија очекува без проблеми да се формира новата македонска влада, а земјата да се врати на спроведувањето на реформите.

Како што информира кабинетот на Филе, еврокомесарот нагласил дека препораката за преговори е на сила, но за да продолжи да важи, земјата ќе мора да продолжи со напредокот во спроведувањето на неопходните реформи. Притоа била подвлечени реформите во јавната администрација, судството, борбата против корупцијата и обезбедување на слобода на изразување на медиумите. Во соопштението по средбата се наведува дека од Македонија се очекува да биде меѓу земјите од регионот, кои предводат на патот кон евроинтеграциите, со оцена дека 2011 година ќе биде година на можности за процесот на проширување за Западен Балкан.

Грчките медиуми, пак, најавата за средбата Груевски - Папндреу ја оценија како можност на неформалната средбата да се разговара за изборите кај нас, за името, но и за последниот потег со споменикот. Весникот „Вима“, оценува дека се работи за многу брз, неочекуван потег од страна на двајцата премиери. Според него состанокот меѓу Папандреу и Груевски е показател дека можеби нешто повторно се случува, придвижува за спорот за името, бидејќи повеќе од јасно е дека ЕУ и САД бараат крај на овој пеколен спор меѓу двете држави. Весникот смета дека сега Груевски мора да се соочи со спорот, затоа што веќе нема изговор за одбегнување на ова прашање со предвремени избори. (Н.Р.)