Владата е против изградба на споменик на Тоше на плоштадот

Градот нема да се откаже од идејата на Костовски доколку добие поддршка од граѓаните

Деспина Трајковска

Идејата на градоначалникот Трифун Костовски за изградба на споменик-фонтана на Тоше Проески на плоштадот е последната иницирачка каписла која, по се' изгледа, ќе ја разгори повеќемесечната отворена војна меѓу градската и централната власт. Иако од Владата вчера беа категорични дека се против идејата на Костовски и немаат намера со него да дебатираат на таа тема, Градот Скопје не се обесхрабрува да ја реализира иницијативата, зашто очекува поддршка од граѓаните.

„Иницијативата нема ни да ја разгледаме, ниту пак планираме да се сретнеме со Костовски, иако тоа го побара од нас. Немаме намера да ги коментираме неговите ставови по кое било прашање, особено не за неговите последни идеи и проекти. Уште помалку сега, три месеци пред истекот на неговиот мандат кога граѓаните дефинитивно ќе му пресудат за се'“, ни изјави вчера владиниот портпарол Шефик Дураки.

Од Градот вчера не сакаа да го коментираат ставот на Владата. Очекуваат поддршка од граѓаните кои веќе два дена своето мислење по иницијативата можат да го искажат на веб-страницата на Градот, или преку писмо. Иако досега кај граѓаните преовладува мислењето „против“ иницијативата, од кабинетот на Костовски велат дека е рано да се суди.

„Рано е да ги коментираме резултатите. Анкетата, најверојатно, ќе трае до 10 јануари. Конечниот исход ќе ни ги одреди натамошните насоки“, рекоа вчера од кабинетот на Костовски, каде што очекуваат дека јавноста ќе ја прифати иницијативата.

Сметаат дека при евентуална реализација на идејата, нема да имаат никакви пречки, оти, како што неодамна напомена Костовски, плоштадот е во сопственост на Градот, доделен од Министерството за транспорт и врски на користење 99 години.

Засега, два дена по промовирањето на идејата на Костовски, во јавноста мислењата се поделени. На сајтот на Градот до вчера напладне се изјаснија 555 граѓани. Од нив, 336 не се согласуваат на плоштадот да се изгради споменик на Тоше, а 211 се „за“. Осум граѓани, пак, не се определиле. И читателите на веб-порталот на „Утрински весник“ имаа можност да остават коментар на иницијативата на Костовски. И таму видувањата се различни. „Идејата е супер само да не се злоупотреби во политички цели како концертот во чест на Тоше“, „Тоше не' воздигна како нација. Неговата песна, неговата појава зрачи љубов, чесност, верба, затоа сметам дека треба да има таков споменик на плоштадот“, „Браво за идејата! Доста ни е од споменици на луѓе кои у��ивале и војувале. Ајде да ги славиме радоста и љубовта“, се само дел од позитивните коментари по иницијативата. Дел од граѓаните, пак, се сомневаат во „чесноста“ на идејата. Сметаат дека ова е уште еден чекор на Костовски за непотребна конфронтација со Владата. „Не политизирајте го плоштадот, дајте едноставно фонтана, или некоја модерна скулптура, без конотација со некоја историска личност и политичка инволвираност“, „Ако не сака Трифун споменик од Александар, нека каже така, а не да го користи Тоше за некои негови несогласувања“, се дел од коментарите на читателите.