ДИК упатува: Еднаш гласање, нема мобилни и фотоапарати
На 22 март, со влегување на избирачко место, ќе може да се гласа само еднаш. Избирачите одлучуваат дали ќе гласаат истовремено за шеф на држава и за локални власти, или ќе се определат само за едни избори. На двојните избори ќе има два извода од Избирачкиот список, а гласачите одлучуваат дали ќе се потпишат во двата или само во еден список.
Ова стои во последното од серијата упатства што го подготви Државната изборна комисија, онака како што се договорија политичките партии на последната лидерска средба.
„За претседателските и за локалните избори избирачот може само еднаш да се појави на гласачкото место. Избирачот по сопствена волја одлучува дали ќе го даде својот глас истовремено и за претседателски и за локални избори или ќе се определи да гласа за само еден вид избори“, се вели во упатството на ДИК.
Избирачките одбори добија обврска да им појаснуваат и да ги поучуваат гласачите дека ако се определиле да избираат само за еден вид избори, тогаш нема да им дозволат по втор пат да влегуваат на избирачко место. За претседателските избори ќе се гласа на едно избирачко ливче, а за локалните се добиваат две, за членови на совет и за градоначалник. Само во Скопје за локалните избори гласачите од скопските општини ќе добијат четири гласачки ливчиња. Ова значи две ливчиња за избор на скопски совет и градоначалник и исто толку за избор на општински совет и градоначалник.
Заради обезбедување на тајноста на гласањето, на избирачките места не смеат да се користат мобилни апарати, фотоапарати и други средства за снимање на изборниот материјал и на избирачите. (К.Ч.)
|
