Катната гаража ги изеде парите од ребалансот на буџетот

Градот уште еднаш крена раце од грижата за бездомните лица

Сања Наумовска



Опозицијата во Советот на Скопје го дочека на нож ребалансот на буџетот на Градот, додека мнозинството советници го оценија како пример за домаќинско работење на градоначалникот Коце Трајановски. Во најновиот ребаланс, практично, намалувањето на очекуваните приходи е само 7 милиони денари, за разлика од прераспределбата на многу поголеми суми од една ставка во друга. Така, за сметка на некои многу важни проекти, како што е, на пример, оној за ставање во функција на езерото „Треска“, или згрижувањето бездомници и домашната нега на изнемоштените лица, парите сега ќе отидат за изградба на катна гаража и за субвенционирање на јавните претпријатија.

За некои советници, ова е само игра на градската администрација со приоритетите, што за граѓаните ќе значи одложување на одредени важни проекти, како што се водоводни системи, управување со сообраќајот и слично. Опозицијата негодуваше поради малото кратење на средствата, кое, според нив, не соодветст��ува со брзината на полнење на градската каса.

„Само 14,9 проценти од приходите се прибрани во буџетот, па сметаме дека предложениот ребаланс не соодветствува со реалната состојба“, рече советничката од СДСМ, Софија Куновска, според која, ослободувањето на централната власт од парите за комуналии за нејзините проекти го осиромашува буџетот.

Градоначалникот Коце Трајановски, пак, презентираше спротивни бројки, според кои, полнењето на буџетот е за 50 проценти поголемо отколку во истиот период лани.

„Сметам дека ребалансот ќе помогне проектите да функционираат во рамките на реалните можности на Градот“, рече Трајановски. Ќе има пари за сите капитални проекти, како што се „Илинденска“, „Србија“, „Македонска војска“, „Благоја Стевковски“, како и за реконструкција на патот кон Рашче и за системот за отпадни води во село Лисиче.

Едно од најголемите кратења е од проектот за езерото „Треска“, каде што од вкупно 30 милиони денари, средствата се намалуваат за цели 20 милиони. Приближно толку се скусува и од проектите за јавно осветлување, додека од 6 милиони денари предвидени за Противпожарната бригада, останува само 1 милион, а со нула денари остануваат ставките за згрижувањето бездомници, домашната нега на изнемоштените лица, како и Центарот за рехабилитација на зависници.

Од парите првично наменети за овие проекти, дури 56,5 милиони денари ќе се искористат за катната гаража, од кои 15,5 милиони се за експропријација на земјиштето на кое ќе се гради. Одлуката за изградба на катна гаража, која се донесува на средина на година и која не била воопшто планирана при кроењето на буџетот во почетокот на годината, за опозицијата во Советот е несериозна.

„Дали толку лошо е планиран буџетот во почетокот на годината, што само 6 месеци подоцна трпи вакви распределби?“, праша советникот Игнат Виларовски, кој нагласи дека проектот за езерото „Треска“ не може да се компензира со изградба на градска плажа.

Од ребалансот ќе имаат корист и јавните претпријатија. За „Улици и патишта“ се одвојуваат 30 милиони денари, за „Паркови и зеленило“ 24,4 милиони, а за „Комунална хигиена“ 20 милиони денари. Парите што ќе ги добијат се наменети првенствено за зголемување и за обновување на возниот парк на претпријатијата, најави градоначалникот. Околу 50 милиони денари ќе му се исплатат и на АД „Бутел“ за одржување на градските гробишта, поточно за ставките за одржување на зеленилото, улиците, осветлувањето, како и за изнесувањето на сметот.