Еден месец притвор за Агим Красниќи и осуммина негови пријатели

Красниќи е осомничен дека на денот на изборите формирал злосторничко здружение

Љубиша Станковиќ

Четворица кондовци и петмина жители на скопското село Батинци од вчераутро се на издржување 30-дневен притвор што им е изречен поради основан сомнеж дека сториле неколку кривични дела. Осумчлената група, која по извршен распит пред истражен судија заврши во затворот „Скопје“, според Јавното обвинителство ја сочинуваат Агим Красниќи (29), Мустафа Нухи (29), Авдула Јусуфи (25), Сефат Рамадани (24), Халим Рамадани (61), Даум Фазлиев (28), Имер Исмаил (30), Рихан Мемеди (19) и Бедри Мемети (30). Тие се осомничени за злосторинчко здружување, за спречување на избори и гласање и за недозволено изработување, држење и тргување со оружје или распрскувачки материи.

Красниќи е осомничен дека на денот на одржувањето на парламентарните избори формирал злосторничко здружение на кое како припадници се јавуваат другите седуммина осомничени. Всушност, се' почнало по еден телефонски разговор меѓу Агим Красниќи и батинчанецот Мустафа Нухи. Во разговорот на Красниќи му биле потврдени претходните сознанија за полнење на гласачките кутии во скопското село Црн Врв. Притоа, било договорено да се појде во ова село и самите тие да ги спречат наводните изборни нерегуларности, односно со употреба на сила да го оневозможат гласањето. По разговорот со Нухи, Красниќи стапил во контакт со осомничените Сехат Рамадани, Халим Рамадан и Даим Фазлиев. Откако зале поголемо количество оружје и муниција, кое го сместиле во багажникот на џипот „гранд чироки“ со косовски регистарски таблички, се упатиле кон Батинци. Кога стигнале пред селото биле пречекани од преостанатите членови на групата. Четворица биле во џип управуван од Авдула Јусуфи, вработен како полицаец во ПС „Аеродром“, по што двете возила го продолжиле патот. Кога стигнале во селото Цветово на групата што ја предводел Красниќи и' било сугерирано дека се работи за село во кое не живеат Албанци, па тие го продолжиле патот кон Марков манастир, каде што биле пресретнати од полицијата, по што се уапсени.

Агим Красниќи и неговите пријатели, за случувањата пред четири години во месноста Борови над селото Кондово, каде што биле снимани како вежбаат во униформи и со оружје, беа обвинети за тероризам и за казнување за подготвување тероризам. Меѓу обвинетите беа и Рамадани и Фазлиев, а првиот заедно со Красни��и се товареше и за грабнувањето на Шеваљ Муареми од селото Грчец. По долги перипетии, Судскиот совет на Основниот суд Скопје 1, со кој раководеше судијката Снежана Бајлозова, утврди дека обвинетите не ги сториле делата и беше изречена ослободителна пресуда. Но, таквата одлука неодамна беше укината од повисокиот суд, но судијката Бајлозова замина на нова должност - судија во Апелациониот суд во Скопје, па по овој предмет сега ќе постапува друг судија. Освен за тероризам и за грабнување, Агим Красниќи се товари и за исчезнување компјутери од Основното училиште во Кондово. Минатата година Красниќи успеа да го преживее атентатот што беше извршен пред влезот на неговиот дом. Напаѓачот се' уште не е пронајден.