ПЕЛАГОНИЈА

Невреме носеше добиток од Штавица

Скршени дрвја, удавен добиток, поплавен тутун се последиците од силната бура

ПРИЛЕП - Скршени дрвја, удавен добиток, поплавен тутун се само некои од последиците што ги предизвика силното невреме завчера попладне во мариовското село Штавица. Селаните се исплашени и велат дека вакво невреме не паметат во последните пет децении. Животот на населението од овој крај дополнително е отежнат, бидејќи поради невремето се исклучени од електромрежата.

„Кога почна бурата, уште бевме во полето. Паѓаа громови како змии врз земјата, а потоа почна силен град. Се слеваа во Штавичка Река поројни наноси од планината кои туркаа се' пред себе. Овците исплашени трчаа на сите страни, а ние немоќни се обидувавме да ги спасиме. Како што вадевме грло по грло од добитокот така голем број овци, крави, телиња ги однесе бурата. Не знаеме сега каде се. Некаде по текот на реката. Најверојатно се однесени во некои други села“, раскажуваат Даниела и Дице Трајкоски. Тие ги проценуваат штетите на околу 5.000-6.000 евра, зашто невремето го уништило расадот за шесте хектари со тутун и над 25 грла добиток.

Жителите на Штавица велат дека повеќе од пет часа се бореле со водната стихија, која била сериозна закана и за нивните животи. Вознемирени и во безизлезна состојба, овие луѓе итно бараат помош од градоначалникот на Прилеп, Марјан Ристески, но и од Владата.

„Владата и Министерството за земјоделство мора итно да не' обесштетат, зашто по оваа елементарна непогода остануваме без егзистенција. Сите стотина куќи во Штавица живеат исклучиво од тутунопроизводство и сточарство. Без парична помош ќе останеме и без леб“, вели Трајче Маркоски. (Мн.Т.)