Коњановски бара прием во НАТО со референцата

Никој не може да каже дека има застој во реформите, изјави министерот по средбата со Роберт Гејтс во Вашингтон

За САД нема дилеми: тие ја почитуваат, ја ценат и ја вреднуваат Македонија и и' даваат силна поддршка за влез во НАТО, изјави министерот за одбрана Зоран Коњановски по синоќешната средба во Вашингтон со американскиот секретар за одбрана, Роберт Гејтс. Коњановски го скрши мразот во односите со САД, како прв македонски функционер кој доби официјална средба со висок претставник во Вашингтон.

Пораката што ја пренел Гејтс е дека се вреднуваат и се препознаваат реформите што ги прави Македонија и придонесот што македонските војници го даваат во мисијата ИСАФ во Авганистан.

„Нема дополнителни забелешки во однос на членството на Македонија во НАТО. Од наша страна беше посочено дека Македонија го бара заслуженото, да се вреднуваат реформите и што поскоро да биде дел од Алијансата“, рече министерот.

Според него, реформите се завршени и не постои членка на Алијансата, која може да каже дека не е така и оти има застој, но дека останува непринципиелното отворено прашање за спорот со името со Грција. Решение за влез на Македонија во НАТО, смета тој, би можело да биде земјата да стане членка на Алијансата под привремената референца, бидејќи никој не може да гарантира дека за една или две години спорот ќе биде решен.

На средбата со секретарот за одбрана, Гејтс, на која присуствуваа и началникот на Генералштабот на АРМ, Мирослав Стојановски, и началникот на Здружениот штаб на вооружените сили на САД, адмирал Мајкл Мулен, станало збор и за соработката што Македонија ја имаше со САД во минатото, за актуелната состојба во Авганистан и за напорите што се прават од здружената коалиција да се среди состојбата во земјата, како и за идните планови за соработка меѓу двете министерства и армиите.

Исто така, Коњановски се сретна и со сенаторот Џон Мекејн, кандидат на Републиканската партија на последните претседателски избори во САД. На средбата станало збор за состојбата во Македонија и во регионот, како и за заедничките американско-македонски предизвици. Претходно Коњановски имаше работен ручек со претставници на неколку американски тинк-тенкови.

Македонскиот министер за одбрана денеска ќе има обраќање пред Стратешката сесија на Атланскиот совет, по што ќе оствари средби со помошникот на државниот секретар во Бирото за воено-политички прашања на Стејт департмент, Андрју Шапиро, како и со сенаторот Патрик Леахи, кој ја поднесе најновата резолуција за Македонија до Сенатот, и со конгресменот Роберт Адерхолт, еден од потписниците на писмото до претседателот Барак Обама, Македонија да биде примена во НАТО на Самитот во Лисабон. (Н.Р.)