Претходен број

Кој стои зад гафот на Иванов

За пропустот со помилувањето на Арнаудов ВМРО-ДПМНЕ го обвини Бранко Црвенковски

Соња Крамарска

Претседателот Ѓорге Иванов за кусо време направи два гафа што ќе се паметат: премислувањето околу нивото на посетата на косовскиот претседател Фатмир Сејдиу на Македонија и потпишаната, па отповикана одлука за помилување на Ламбе Арнаудов. И додека гафот со косовскиот колега беше пеглан на „интимна вечера“, Арнаудов веројатно нема да добие ниту шолја кафе во знак на извинување што неговите затворски денови ненадејно експлодираа во политички случај меѓу шефот на државата и засега н.н. (непознато) лице.

Вчера скандалот со помилувањето беше топ-тема во политичките кругови и на социјалната мрежа „Фејсбук“. „Подобро е да не знаеш да пишуваш, а камоли да потпишуваш“, „Претседателе, помилувај ме и мене, но немој така како Ламбе Арнаудов“ - се само дел од сеирџиските пораки до претседателот на државата, Ѓорге Иванов.

Притоа, во фокусот на вниманието е прашањето која е таа политичка сила што го натерала Иванов само за неколку минути да се повлече од својата првична одлука. Дали е тоа политичката моќ што ја има над него премиерот Никола Груевски, кој го смета Ламбе Арнаудов за дел од фракцијата на поранешниот лидер на ВМРО-ДПМНЕ, Љупчо Георгиевски, или пак се случило нешто друго.

Гневни поради скандалот и во обид да го забошотат, први реагираа од владејачката ВМРО-ДПМНЕ, фрлајќи ја сета вина на поранешниот претседател на државата, Бранко Црвенковски. Нивната поента што може да се прочита меѓу редови е дека луѓе на Црвенковски го наместиле Иванов:

„Ги повикуваме Бранко Црвенковски и СДСМ да престанат да ги злоупотребуваат државните службеници и јавната администрација во своето политичко дејствување. СДСМ и Црвенковски не престануваат и кога се во опозиција да вршат инструментализација на јавната администрација“, рече портпаролот на ВМРО-ДПМНЕ, Александар Бичиклиски.

Сепак, за да ја намалат политичката штета за актуелниот претседател на државата Иванов со една такво тврдење, од ВМРО-ДПМНЕ ги проширија обвинувањата кон Црвенковски и дека на последната лидерска средба покажал доверливи владини документи кои, според владејачката партија, „се украдени“. ВМРО-ДПМНЕ тврди и дека пратениците од СДСМ при пратеничките прашања „ваделе полуфабрикувани и фабрикувани документи“, а алузијата е на доказите што Владо Бучковски ги поднесе за истовременото примање плата и пензија на министерот Михаило Маневски.

Портпаролот на ВМРО-ДПМНЕ, Бичиклиски, за крај на овие обвинувања го испали и главниот рафал. „Искористување на државните служби доживеа кулминација вчера кога беа доведени во заблуда службите во кабинетот на претседателот Иванов и на крајно дрзок и безобразен начин во листата беше додадено лице за кое очигледно претседателот Иванов никогаш не дал согласност да биде помилувано“, рече тој.

Но, да биде скандалот поголем, она што го понуди како објаснување претседателот Иванов е сосема поинакво и со поинаков тон. Според него, се случила ненамерна грешка. „До пропустот дојде поради тоа што во ’Службен весник‘ е објавена листата за консултации, а не конечната листа на лица кои целосно или делумно се ослободуваат од натамошно извршување на казната затвор“, вели Иванов.

„Грешката е констатирана, ја признаваме и таа ќе се исправи со објавувањето на новата одлука во ’Службен весник‘. Дојде до одредено отсуство на комуникација, бидејќи во летниот период дел од кабинетот е во Охрид, а дел во Скопје. Им се извинувам на македонските граѓани што направивме ваков технички пропуст“, неуверливо се правда Иванов.

Министерот за правда, Михајло Маневски, кој по функција учествува во процедурата за доставување предлози за помилување до претседателот, вчера одби да даде одговор во парламентот дали дал препорака за помилување на Арнаудов. Прашањето му го постави пратеникот од СДСМ, Менде Диневски, кој рече дека неуспешното помилување е доказ дека претседателот Иванов е марионета во рацете на премиерот Груевски.

„Вчерашното скандалозно помилување е дрско, грубо и повеќе од очигледно газење на државните институции и потценување на македонскиот народ. Оваа одлука ја потпишал лично претседателот Ѓорге Иванов. Нема дилеми дека тој е марионета во рацете на Груевски“, рече пратеникот, додавајќи дека не е прифатливо дека станува збор за техничка грешка. Според Диневски, јасно е дека претседателот не ја потпишал одлуката за помилување како список на имиња, туку дека претходно заседавала Комисијата за помилување.

Опозициската СДСМ со доза хумор ја дочека реакцијата на ВМРО-ДПМНЕ и обвинувањата на Црвенковски дека диригира со манипулациите врз новиот претседател Ѓорге Иванов. „Денешната прес-конференција на ВМРО-ДПМНЕ е дефинитивна потврда за очајот и изгубеноста во која длабоко навлегува. Ги повикуваме Груевски и неговата Влада да престанат да ја заплашуваат и понижуваат јавната државна администрација“, реагираа социјалдемократите. Нивната поента е оти е недозволиво, како што велат, за погрешните политики и одлуки виновници да се бараат во редовите на државните службеници.

„Не може поради фактот што министерот за правда со месеци земал и плата и пензија, виновен да е службеник во Фондот на пензиско и инвалидско осигурување на Македонија. Не може за помилувањето на Ламбе Арнаудов виновни да се службениците во кабинетот на претседателот“, порачаа од СДСМ.

Анонимни аналитичари оценуваат дека фактот што во процедурата за именувањето на најновата рунда македонски амбасадори во странски земји никаде не се споменува претседателот, кој има надлежности во таа област, туку само Владата, и фактот што само една сила може да го натера Иванов да го погази својот потпис за помилување на Арнаудов, а тоа е Груевски, се првиот сериозен упад на Владата во претседателските надлежности. Такви ситуации ќе гледаме уште многу во иднина, загрижено велат аналитичарите.