Претходен број

„Транспарентност - Македонија“ ќе ја тужи Владата за кампањите

Катица Чангова

„Транспарентност - Македонија“ најавува дека ќе ја тужи Владата на Никола Груевски за расипничко трошење на јавните пари во функција на кампањи. Невладината организација вчера побара од Владата да престане со чување на тајната за кампањите и конечно да објави колку милиони евра даночни пари потроши во изминатите три години.

Бројните критики и економската криза не ја поколебаа власта да отстапи од прескапата забава на сметка на народот. Напротив, велат во „Транспарентност“, Владата доби стимул со уште поинтензивно темпо да инвестира во себефалење. Најнови агит-пропки на Владата се огласите „Кампања за борба против корупцијата“ и „Истражи ја Македонија“.

„Експертски тим размислува за тужба и проценува дали има основа за кривично гонење. Се' уште не сме сигурни дали тоа ќе биде колективна тужба, за Владата во целина, поединечна, за некои министри, или ќе биде адресирана за генералниот секретар“, изјави вчера за „Утрински весник“ претседателот на „Транспарентност - Македонија“, Сашо Орданоски.

Владата не се откажува од маркетинг-владеењето, но затоа лицемерно, под слоганот „И душата да ни ја земете - пари во Буџетот нема!“, силно го стегна ременот за просветарите. Притоа ги одби барањата на СОНК за поместување на платите и надоместоците за луѓето во образованието, беше потенцирано на вчерашната прес-конференција на „Транспарентност - Македонија“, кога беше презентиран ноемврискиот извештај.

„Хипокризијата на власта е уште поголема и поради фактот што не штедеше во зголемување на платите на стотина директори на владини агенции, бироа, дирекции за да им помогне во справување со скапотијата“.

Провокациите на новинарите во вид на прашања упатени до премиерот и до министерот за финансии, како и до сите надлежни институции во државата, досега не открија колку пари од Буџетот отидоа за владина пропаганда. Веќе не поминува вообичаениот одговор кој стигнува од претставниците на власта, дека користа од закупувањето простор за промоција во домашни и во странски медиуми ќе биде поголема отколку потрошеното.

И додека стигне одговор од власта или додека не го обелодени тоа Државниот завод за ревизија, јавноста и натаму калкулира со износи од 20 милиони евра до 50 милиони евра п��трошени за кампањи.

„Транспарентност - Македонија“ вчера побара од Антикорупциската комисија да излезе со став околу неспојливоста на функцијата и конфликт на интереси во случаите кога високи владини функционери и државни службеници блиски на министрите членуваат во неколку управни одбори во јавни претпријатија и установи. За невладиното тело е неприфатлив ставот на ДКСК дека станува збор за комплексни случаи.

„Неефикасноста, колебливоста и селективноста на Антикорупциска во одлучувањето за ваквите случаи придонесува оваа скандалозна политика на власта, наместо да се санкционира, да продолжи со засилен интензитет. Пасивниот и селективен однос е нотиран и во извештајот на Европската комисија за прогресот на Македонија во 2007, каде што јасно стои дека ’Државната комисија за спречување на корупцијата не ја исполнува во доволна мера својата улога на предводник во антикорупциската борба и дека треба да биде поактивна во јакнење на јавната свест‘“.