Од бившата девојка барал 200 евра, инаку ќе ја убиел
ПРИЛЕП - Александар Шукулоски (20) од прилепското село Воѓани, завчера околу 19 часот, ја грабнал својата поранешна 15-годишна девојка, обидувајќи се да и' изнуди пари. Малолетничката со тројца соученици излегувала од училишниот двор кога го здогледала автомобилот „голф“ на поранешното момче. Бидејќи и претходно имала слични закани од момчето, таа ги повикала соучениците да го сменат правецот.
„Тој се упатил кон нив, ја застанал девојката и почнал да вика, принудувајќи ја да се влезе во автомобилот. Ја удирал со шлаканици, ја тргал за косата, а главата и' ја удирал од шасијата на возилото. Од под возачкото седиште извадил пиштол, заканувајќи и' се дека ќе ја убие, ако наредниот ден не му донесе 200 евра“, информира Ѓоко Стрезовски, портпаролот на СВР-Битола.
Малолетничката ја искористила неговата невнимателност и успеала да избега од возилото, па со друго такси-возило стигнала до автобуската станица. Кога пристигнала дома, веднаш им се пожалила на родителите. Таткото го пријавил случајот во полиција. (Мн.Т.) |
