Политиката се вмеша и во одбојката

Моника Талеска

ПРИЛЕП - Повеќе од еден месец шеесетина млади одбојкарки од Прилеп не тренираат во салата на Основното училиште „Гоце Делчев“, а случајот добива судска разврска и се' поголема политичка димензија. Нивниот тренер Слободан Ристески тврди дека директорот на училиштето, Трајче Каралиоски, го тужи за клевета, затоа што неодамна изјави дека не дозволувал тренинзи во објектот, само затоа што е член на СДСМ. Револтиран поради тужбата од Каралиоски и фактот што одбојкарките и натаму немаат простор за тренинг, Ристески и неговите сопартијци протестираа пред локалната самоуправа, изразувајќи го незадоволството, како што беше речено, од диктаторската политика и реваншизам што ја практикува локалната власт.

„И сто тужби да поднесат, јас ја кажувам вистината, а тие треба да се соочат со себе и со своите лаги. Ниту господинот Каралиоски ниту ВМРО-ДПМНЕ нема да ме заплашат со диктаторските методи на практицирање на власта што ги поминуваат сите граници. Не бираат веќе ни место, ни луѓе, ни методи на закана“, нагласи Ристески.

Тоа дека на тренерот му е забрането да одржува тренинзи со одбојкарките во салата во ��чилиштето само затоа што е член на СДСМ потврди и нивниот колега Јане Џингоски, кој е дедо на едно од децата што тренираат во одбојкарскиот клуб.

„Отидовме заедно со Ристески кај Каралиоски, а тој му кажа отворено дека добил забрана од локалната власт да ги тренира децата во училиштето. Затоа што, Ристески, како член на СДСМ, ја критикуваше актуелната власт и состојбите во образованието. Ова е целата вистина“, потврди Џингоски.

Директорот Каралиоски во неколку наврати категорично ги демантираше овие наводи. Тој тврди дека нема никаква политика во овој случај и дека за користење на салата одлучува Управниот одбор на училиштето.

Од локалната власт, пак, потврдуваат дека директорот и Управниот одбор на училиштето одлучуваат за сите случувања во училиштето и дека немаат никакво влијание врз нивната работа.

„Ние само ги поставуваме директорите. Немаме никакво влијание врз нивната работа и врз работата на Управниот одбор на училиштето. Сметам дека директорот Каралиоски оправдано бара да се потпише договор со одбојкарскиот клуб. Директорот само инсистира на почитување на законот“, изјави Димитар Стевананџија, претседател на Советот на Општина Прилеп.

Ристески тврди дека Управниот одбор на училиштето го одби неговото официјално барање за одржување тренинзи, со образложение дека тренерот го нарушил угледот на училиштето со изјавите дадени во медиумите.