Грчките хакери го возвратија ударот

Македонско-грчкиот спор сега им го крена притисокот и на вработените во „Гугл“. По завчерашниот хакерски упад од македонска страна на „Google Earth“ со поставување македонско знаме до познатата Бела кула во Солун, сега веројатно и грчките хакери враќаат со иста мера.

Наводно, вчера македонските корисници на овој сервис забележале дека во тридимензионалната мапа на „Гугл“ во центарот на Скопје, кај Старата чаршија, се поставени албански знамиња. Според официјалното соопштение на Министерството за надворешни работи, по поплаки и укажувања од граѓаните, од МНР испратиле реакција до централата на „Гугл“ за да им ја посочат грешката. На македонското барање компанијата одговорила дека станува збор за хакерски упад во системот, а не за нивна грешка, изразувајќи уверување дека пропустот веднаш ќе биде отстранет.

Националистичките препукувања и провокации меѓу македонските и грчките државјани не се ништо ново. Она што најмногу не' чуди е дека министерствата за надворешни работи од двете држави се фатија на орото и им дадоа значење на вакви банални препукувања. (М.П.)