Силата ја напушта мајката на млекарот

Лиле Илиевска вчера се онесвести. Политичари дефилираат во дворот на семејната фарма

Битола - Нервите попуштиле, нозете веќе не ја крепат 57-годишната Лиле Илиевска, мајка на млекарот Душко, која падна на земја во бессознание додека на својата фарма во Битола се обидуваше пред новинарите да објасни какви притисоци трпи семејството од полицијата. Падна во меѓата скршена од болка што нејзините два сина Душко и Цане и сопругот Томе се во притвор осомничени за одгледување марихуана. Прво на што се сети откако се освести беше апсењето на нејзините чеда и на сопругот.

„Ах, леле, леле, четворица дојдоа, не беа во полициски алишта, беа облечени обично. Ми рекоа дека нема ништо страшно, само сакале да го прашаат нешто Душко. И ми го зедоа детето. Томе стана и рече дека нивите се негови, не се на Душко, и на двајцата им ставија лисици, а мене ми рекоа да не зборувам многу оти ќе ме врзеле. Обесете ме подобро, нека знае народот оти Хитлер вака им правел на луѓето како што сега вие ни правите. На правдина не' земате“, зборуваше мајката Лиле, која последната недела од мака заборавила да јаде, да пие и да спие, заборавила на лекарства.

Притрчавме да и' помогнеме, излезе и нејзината 27-годишна снаа Вера. Снагата и' затрепери, солзи и' потекоа кога ја виде мајката легната на земја зашто Лиле сега е столбот на фамилијата.

Жените постојано прашуваа се' погласно и погласно дали ова мачно семејство што се' во животот спечалило со мака и со своите рамења, може да биде дилер на дрога.

„Да ги пуштат мажот ми, свекор ми и девер ми од затвор. Тоа ни е маката и болката. Децата ни се плашат и плачат, прашуваат кога ќе си дојдат од затвор. Утре, им велиме, утре, ама до кога ќе ги лажеме“, рече облеана во солзи помладата снаа на семејството Илиевски, 27-годишната Вера, која за Цане дошла во Македонија од албанскиот град Скадар.

Фармата на Илиевски во индустрискиот дел на градот стана место за парада на политичките партии, но и на бизнисмени, кои најавија дека секој ден ќе ги откупуваат земјоделските производи од нивите на Илиевски. Вчера со предизборна сценографија со свилени знамиња и со маици на кои пишуваше „Брат Љубе“ дојде лидерот на Обединети за Македонија, Љубе Бошкоски, со дел од своето членство. На мајката Лиле и' понудија да помош во нивите околу летнинат��, но и правна помош.

Изнемоштената жена јасно им порача: „Не ми треба помош на нива. Мажите да ги извадите од затвор“, рече тивко Илиевска.

Ексминистерот за внатрешни работи, Бошкоски, се обиде да ја утеши мајката зборувајќи дека и тој во два наврата бил жртва на политички монтиран процес.

„Тука сме да му помогнеме на семејството се' додека судот не докаже дека не може никој Душко и неговата фамилија да ги прогласува за виновни и да го апси на ваков спектакуларен начин. И јас сум жртва на два монструозно монтирани процеса. Но, наркодилерите и наркобосовите живеат и се на врвот на македонската полиција. Затоа ќе побараме да се изврши претрес во становите на високи политички функционери“, рече Бошковски, обвинувајќи дека Владата комплетно ја контролира судската власт поигрувајќи си со човечките судбини.

Бошковски понуди експертиза за нивите на Илиевски каде што полицијата пронајде над 200 стебла канабис сатива.

„Марихуаната е присутна насекаде, но Министерството за земјоделство е должно да ги отстрани овие диво растенија, бидејќи самото берење од обични граѓани претставува кривично дело. Уште пред две години е апелирано за оваа состојба во Битола и ништо не е направено од страна на Министерството. Од ботанички аспект и во дивиот коноп има супстанција од која би можело да се прави дрога, па дури и во конопот што го користат водоинсталатерите. Но, прашањето е дали некој свесно го одгледува. Ако сакате да видите како личи одгледувана марихуана во плантажа, ја има во Стојаково, селото каде што премиерот е зет“, рече Владимир Вангелов, агроном, експерт за земјоделство во Обединети за Македонија.

И покрај тоа што Министерството за земјоделство е посочено како одговорно за расчистување на состојбите во битолско поле каде што веќе на големо се апелира дека е преплавено со диворастечка марихуана, вчера при посетата на Битола министерот Љупчо Димовски рече дека ниту една од надлежните институции не поднела барање да се изврши увид на теренот.

„Доколку биде побарано тоа од нас, ние во секој случај ќе извршиме механичко или хемиско уништување на канабисот. Но, само доколку станува збор за оној полски канабис“, рече министерот Димовски. (А.Б.)