За зонско во „Лептокарија“ ќе одлучуваат станарите

Станарите од околните згради на трговскиот центар „Лептокарија“ во Карпош 3 ќе одлучат дали на постојниот паркинг да се воведе зонско паркирање. Од наредната недела Општина Карпош заедно со „Градски паркинг“ ќе спроведе анкета меѓу жителите и генералното мислење ќе пресече дали ќе се реализира идејата на претпријатието за наплата на паркирањето.

Испитувањето на мнението, како што најави вчера градоначалникот Стевчо Јакимовски, дефинитивно ќе биде пресудно, бидејќи од Општината и од „Градски паркинг“ и по неколкумесечни преговори, не нашле заеднички јазик околу конкретното прашање.

„Заклучивме дека анкетирањето е најдобар начин за конечно да го пресечеме проблемот, бидејќи јас сметав оти во ’Лептокарија‘ не е нужно зонско паркирање, а од ЈП имаа спротивно мислење. Начелно се договоривме да се испочитува желбата на 60 отсто од испитаниците, односно доколку толкав процент од станарите се изјасни „за“ зонското, тоа да се спроведе и спротивно, ако се „против“, да нема. И во анкетирањето ќе соработуваме со ЈП, целата постапка ќе ја следат по двајца претставници од Општината и од ‘Градски паркинг‘“, рече вчера Јакимовски, кој смета дека на територијата на Карпош воопшто нема проблеми со паркирањето.

Во случај зонското паркирање да се имплементира во „Лептокарија“ тоа ќе се наплаќа по условите за Д зона. Корисниците на паркингот нема да имаат ограничено време за задржување, а еден час паркирање ќе ги чини 25 денари. За станарите, пак, од околните згради ќе има повластен месечен билет од 200 денари, а правните лица што гравитираат околу паркингот за негово месечно користење би плаќале 750 денари. (Дс.Т.)