ДВД изданија на филмовите на Милчо Манчевски

Трите долгометражни играни филма на Милчо Манчевски „Пред дождот“, „Прашина“ и „Сенки“ се издадени во ексклузивен ДВД сет, чиј издавач е дистрибутерот „Манаки филм“. Ова е втора едиција на ДВД изданија на филмовите на Милчо Манчевски, само овој пат збогатена и со третиот филм „Сенки“. Имено, во 2003 година беше издадена првата ексклузивна ДВД колекција на неговите филмови „Пред дождот“ и „Прашина“, која тогаш беше наменета за прославата на Илинден и за дипломатските претставници. Додека, овој ДВД сет, како што најавува дистрибутерот, ќе биде достапен за купувачите за првпат во матичната земја.

Овој сет е и збогатен со досега необјавени материјали и со филмски и музички додатоци во траење од четири часа. Како што објаснува дистрибутерот „Манаки филм“, станува збор за исклучително издание според неговите технички карактеристики, за чии потреби се изработени нови мастери на сликата и на тонот во англиски и германски лаборатории односно во „Ранк“ и во „Дуарт“.

Изданието содржи и два ЦД-ром подароци, и тоа: со „Прашина“ е издаден и целиот истражувачки материјал од подготовките на филмот, а со „Пред дождот“ е вклучено и електронско издание на монографијата „Дожд“, посветена на одгласите за овој филм во светот.

Оваа ДВД колекција ќе може да се набави во сите специјализирани продавници за филмски и музички изданија, во книжарници и на други продажни места. (С.У.)