Пијан штипјанец нападнал браќа со нож Деветнаесетгодишен штипјанец е приведен, откако во алкохолизирана состојба, со нож нападнал двајца свои сограѓани. Инцидентот, како што соопшти МВР, се случил завчера, околу 20,15 часот, кога Адем И. (19) ги нападнал браќата Т.М. (36) и Р.М. (43) пред ТЦ „Штип“. Браќата почнале да бегаат, но Т.М. се сопнал и паднал, напаѓачот го извадил ножот и се обидел да го прободе, но Т.М. успеал да се оттргне и да побегне. Браќата трчале кон полициската станица, каде што Адем повторно ги стигнал и ги нападнал. Полицајците ја смириле ситуацијата, по што следувал алко-тест. Браќата имале 0,12 промила алкохол во крвта, односно 0,41, додека кај напаѓачот биле измерени 1,73 промили. Првично, причина за инцидентот била расправија.
Т.М. и Р.М. биле пренесени во болница каде што им биле констатирани телесни повреди. По расчистување на случајот, полицијата против 19-годишникот ќе поднесе соодветна пријава. (Г.А.)
