„Алкалоид“ во Србија продолжува со ширење

„Алкалоид д.о.о.“ Белград самостојно произведува 31 фармацевтски производ. Производните капацитети зафаќаат површина од 916 квадратни метри, од кои близу 700 м2 се производни капацитети, а останатите се административен дел. Годишно може да се произведуваат 23 милиони блистери или околу 10 милиони кутии готов производ. Вкупната вредност на досегашната инвестиција е околу 750.000 евра со план за натамошно проширување и надградување.

Инаку претседателот Ѓорге Иванов вчера ја посети „Алкалоид“ во Белград заедно со Живко Мукаетов, генерален директор и претседател на УО на „Алкалоид“.

Подружницата на „Алкалоид“ во Белград е една од тринаесетте, која нашата најголема фармацевтска компанија ги има во светот, покрај Швајцарија, Словенија, Албанија, Косово, Бугарија, Босна и Херцеговина, Хрватска, Романија, Црна Гора, САД, Русија и Украина.

Белградската подружница има статус на средно претпријатие, со 41 вработен локален кадар во административниот дел на медицински маркетинг и 15 во производните капацитети. Производните активности се однесуваат на широк спектар на фармако-терапевтски групи и тоа: антиинфективни лекови, лекови за третман на кардиоваскуларниот систем, нервниот систем, како и лекови за третман на гастроинтестиналниот тракт. (Ек.Р.)