Мртвите ќе почнат да пливаат

Од АД „Бутел“ тврдат дека насобраната вода од гробиштата ја црпат со специјални пумпи

Снежана Калабакова


Фали уште еден поголем дожд, па мртвите од Бутел да почнат да пливаат над вода. По секое пообилно врнење, се поплавуваат можеби стотина гроба во средишниот дел од гробиштата што се блиску до патот за „Чардак“, а водата се заканува дека ќе ги урне и оние гробови што се' уште издржуваат на притисокот. До гробовите може да се пријде единствено во гумени чизми, но и така мора да се чекори меѓу крастави жаби.

„Не можеме ниту да дојдеме до гробовите, а наоколу крекаат жаби, како да се наоѓаме среде некое огромно мочуриште. Ги има многу, па дури се качуваат и на спомениците. Лани едно семејство за да си ја погреба бабата мораше прво да се ангажира да се исцрпи водата од гробот“, тврди една скопјанка, која се пожали дека вода имало и завчера кога била на гробиштата во Бутел.

Таа раскажува дека гробовите по секој дожд се' повеќе и повеќе тонат во вода, а така било и оваа митровденска Задушница, кога едвај можела да пријде до гробовите. Оваа граѓанка тврди дека и покрај сите нејзини поплаки и реакции до управата на АД „Бутел“, досега ништо не е преземено. Им сугерирала на одговорните да ја канализираат водата со цевки и така да истекува во коритото на реката Серава за да не газат со чизми кога влегуваат на гробиштата и за да не мораат да поставуваат плочи за да поминат преку калта.

Се пожали дека одговорните од АД „Бутел“ ја препраќале во општината Бутел, од каде што и' било речено дека локалната самоуправа е ненадлежна за тоа. Со проблемот го запознала дури и градоначалникот Коце Трајановски. Од лани се шета од една до друга институција и никој ништо не презема, и покрај тоа што сите сопственици на гробови на градските гробишта редовно плаќаат за одржување. Но, и покрај тоа, околу гробовите постојано има ѓубре што не се чисти редовно, тревата ретко или само на одредени места се коси дури, а не се сечат ни гранките од дрвјата. Сето тоа, според оваа граѓанка, само сведочи дека гробовите не се одржуваат како што треба.

„Проблемот со поплавувањето на дел од парцелите во гробиштата Бутел, кои се наоѓаат во близина на магистралниот пат е анализиран и градоначалникот Коце Трајановски побара од надлежните служби да изработат проект за одводнување на атмосферските води. Изработката на проектот е при крај, а се планира да биде реализиран во текот на наредната година, за што се предвидени средства во буџетот за 2011 година“, велат од Одделението за односи со јавност во Градот.

И директорот на АД „Бутел“, Илија Филиповски, потврди дека се бара решение за проблемот, за што, како што вели, нема да се штедат ниту време ниту пари.

„Ги преземаме сите технички мерки и нон-стоп работиме на решавање на проблемот за одлевање на насобраната вода околу тој дел на гробиштата. Водата ја исцрпуваме со специјални пумпи, бидејќи таа создава проблеми веќе шест години. Работиме заедно со Градот и со ЈП ’Водовод и канализација‘ колку е можно да се исцрпи таа вода додека не се реализира дефинитивното проектно решение“, објасни Филиповски.