Ракот на дојка е во пораст

Влатко Митов, Скопје

Октомври е месец посветен на едукацијата и подигањето на свеста за ракот на дојка и неговата превенција. Ова е време кога би требало да се свртите кон своите најблиски и да разговарате со жените во вашиот живот - без разлика дали е тоа вашата мајка, пријателка, ќерка или сестра, за ракот на дојка. Тоа е посебно важно за жените над 50-годишна возраст. Ракот на дојка е најчесто малигно заболување кај жената. Кога тој е рано откриен, може успешно да се лекува.

Инциденцата на ракот на дојката е во пораст, особено последниве две децении. Ракот на дојка може да се јави во секоја животна возраст, но сепак почесто се јавува кај жени над 50-годишна возраст. Така 75 отсто од карциномите се јавуваат кај жени над 50-годишна возраст, а 50 отсто кај оние со над 65-годишна возраст.

Во западните земји инциденцата рапидно се зголемува со годините до менопауза (45-55 год.), по што се одржува плато и пак се зголемува од 60-70- годишна возраст, но со помала стапка.

Кај нас, во нашата популација, ракот на дојка е најчест во возрасната група од 45 до 49 години и од 55 до 59 години. Само во изминатава година се дијагностицирани над 700 нови случаи на рак на дојка.

Последниве години, и покрај развојот на медицината, се зголеми морбидитетот за 2-3 отсто и морталитетот за 1-2 отсто годишно. Причините се: зголемувањето на бројот на населението, зголемувањето на постарата популација кај која е почеста појавата на рак на дојка, промена на навиките на живеење (западен стил), зголемено користење храна богата со масти од животинско потекло, а помало на свежо овошје и зеленчук.

За сето ова и многу повеќе може да прочитате на првиот македонски портал за ракот: www.rak.mk

Зад овој проект стои група реномирани доктори-онколози, но и специјалисти од другите области на медицината, кои своето долгогодишно искуство го преточуваат и пренесуваат на оваа веб-страница. Посетете ја и уверете се во нејзиниот квалитет и содржина.