Цеца во Скопје

По мерак на кафеанските сладокусци

Српската турбофолк ѕвезда Светлана Ражњатовиќ пееше три часа пред своите обожаватели во полната сала „Борис Трајковски“

Катерина Шекеровска

Десетина илјади фанови на српската турбофолк ѕвезда Светлана Цеца Ражњатовиќ во петокот вечер ја окупираа спортската сала „Борис Трајковски“, каде што се одржуваше првиот од двата најавени концерта на една од најпопуларните балкански пејачки.

Ѕвездата на Цеца силно сјае во земјава. Македонската публика не само што покажа дека и' е верна, туку на самото место демонстрираше оти нејзините постари хитови не само што се се' уште популарни, туку имаат и нова армија обожаватели, па наизуст ги знае и помладата, тинејџерска публика. Меѓу присутните на концертот имаше комбинирана публика дојдена од сите краишта на земјава, кои за задоволството да ја видат Цеца во живо одвоија ни помалку ни повеќе туку по 1.000 денари за влезница за седење и нешто помалку, 800 денари, за стоење.

Поскапо платените влезници и не и' се исплатуваа многу, зашто кога е Цеца во прашање ретко кој може да остане на своето седиште. Во тој стил и расположените Македонци уште со првата песна грмнаа да пеат „Лепи громе мој“. Озарени лица, овации и пеење на глас ја дочекаа српската ѕвезда, која го почна концертот во најавениот термин, неколку минути по 21 часот, по што следуваше и директно вклучување во програмата на ТВ Пинк и една домашна телевизија и поздрав за сите во Македонија и во Србија. Појавувајќи се во долг црн фустан на прерамки во кој до израз доаѓаше уште еден нејзин атрибут - силиконските гради, Цеца ја отвори вечерта во која се редеа добро познати песни како „Пази с ким спаваш“, „Горе од љубави“, „Манта, манта“, „Брука“, „Драгане мој“... Публиката, која од старт ја следеше во секој стих од песните, а на моменти пееше и место неа, се откачи на „Кукавица“, „Пиле“, „Доказ“, „Београд“...

Во вториот дел, по паузата со трубачите на Дејан Петровиќ, кои ја креваа атмосферата за време на преслекувањето на Цеца и свиреа и стари македонски песни, таа се врати на сцената во ново руво - црвен, до земја „сирена“ со мониста фустан во кој едвај се движеше. Нејзин подарок за распеаната публика беше „Зајди, зајди“, а таа, пак, и' возврати со развејување на огромно македонско знаме (вообичаено на поголемите спортски натпревари), но свртено наопаку! Токму така- македонските фанови во занес и опиеност од својата миленичка го отворија знамето од погрешна страна, па наместо знаме видовме огромна црвена површина што може да се протолкува и како изјава на љубов...

Се редеа песни, се пееја рефрени, се мешаше, кршеше, играше и што уште не... Права кафеанска атмосфера за мерак на сладокусците на Цеца, кои ја направија единствена пејачка што два пати едноподруго успеа да ја наполни спортската сала „Борис Трајковски“ во Скопје.

Цеца и натаму ги прави концертите на стар начин - со скудна сценографија, кореографија, анимација и се' што е потребно за од концерт да се направи спектакл, што е практика на големите светски ѕвезди. Но, и покрај тоа публиката уште еднаш покажа дека и' е верна и задоволна и со едноставно пеење пред микрофон, па два пати ја враќаше на бис.

Концертот заврши малку пред полноќ - исто како што почна, со „Лепи громе мој“ и изведба на суво на дел од стиховите на „Исусе“, што имаа и порака во себе. „Исусе, дај ми лавовско срце да ги преживеам деновите што доаѓаат, лесно ќе минат похрабрите од мене, но мојата душа не знам како...“ и' се обрати Цеца на својата публика во завршницата на тричасовниот настап во преполната сала „Борис Трајковски“.

Во саботата вечер таа го одржа и вториот концерт во Скопје. И двата беа во организација на ТА „Гуливер милс“.