Насловна

И невработените бараат бесплатен градски превоз

Новоформираното Здружение на невработени „Македонија“ ќе бара да се издаваат бесплатни лични карти и пасоши

Јасмина Јовановска


И невработените како и пензионерите од државата ќе бараат да се возат бесплатно во градските автобуси. Ова е една од заложбите на новоформираното Здружение на неврабо��ени „Македонија“. Тие ќе бараат да им се издаваат и бесплатни лични документи, лична карта и пасош, кои ќе ги подигнуваат од Агенцијата за вработување. „Овие поволности ќе може да ги користат сите невработени, се разбира, доколку му се придружат на здружението, бидејќи ќе мора да добијат и заверена картичка од градскиот превоз“, објаснува генералниот секретар на ова здружение, Горан Давитковски. Тој потенцира дека здружението го формирале за да им докажат на државните институции дека невработените лица немаат исти права како и вработените. „Обврските ни се исти, а правата различни“, додаде Давитковски. Освен поволности, ова здружение ќе се залага и за активно вработување на оние што останале без работа. „Ќе бараме активно вработување на невработените, а не како Агенцијата за вработување, која вработува лица што работат само еден месец и потоа пак се на улица“, додава Давитковски. Според него, со подобрувањето на социјалниот и на економскиот статус на невработените ќе се врати социјалниот мир во државата и ќе се намалат криминалот и одливот на мозоци од државата. Давитковски нагласи дека треба да се привлечат инвестиции во земјава што ќе отворат фабрики, а не да се градат трговски центри.

Нивните предлози за бенефиции за невработените ќе ги достават до Владата или, пак, ќе разговараат со пратениците.

Како може да очекуваат државата да им дозволи вакви бенефиции кога од септември ќе им наплаќа на невработените доколку сакаат да имаат здравствено осигурување, од Здружението немаа одговор. Тие беа затечени од законските измени, според кои, невработените ќе мора да пополнат изјава дали и колкави хонорари примаат годишно преку трансакциска сметка. „Државата ќе треба да се запраша зошто овие лица примаат хонорари, а не се вработени“, револтирано вели Воуслав Кукољ. Здружението, сепак, ќе ги разгледа критериумите за добивање сини картони за невработените. „Ќе бараме да се измени критериумот, според кој, лицата што имаат приходи од 15.000 денари и се грижат за четиричлено семејство, да не плаќаат 1.100 денари за сини картони. Што ќе им остане за да преживеат ако се знае дека потрошувачката кошничка е 15.000 денари“, прашува Кукољ.