Уставен е контра европската регулатива, обвинува Јанакиески

„Уставен суд укинува членови од Законот за патен сообраќај, целосно усогласени со европската регулатива, кои доколку Македонија не ги почитува, може да се соочи со санкции, а на домашните превозници да не им биде дозволено да сообраќаат надвор од државата“, предупреди вчера министерот за транспорт и врски, Миле Јанакиески. Тој најави дека Министерството, и покрај одлуката на Уставен суд, нема да се откаже од примена на укинатите законски решенија.

Членовите кои судот ги оценува како неуставни предвидуваат превозник во патен сообраќај за да добие лиценца за превоз да мора да докаже со потврда дека ги платил даноците и придонесите за здравствено, пензиско и инвалидско осигурување за вработените. Дел од членовите утврдуваат што претставува добар углед на транспортната компанија и лицето што го врши превозот и како се докажува, но и што претставува солидна финансиска состојба и на каков начин се докажува. Укинатите членови, укажа Јанакиески, се целосно усогласени со европската регулатива, одобрени од Европската комисија, и се применуваат во државите во ЕУ, а со одлуката на Уставниот суд Македонија се враќа неколку чекори назад во процесот на хармонизација на законите.

„Наша цел е целосно усогласување со европската регулатива и со измените на законот, кои веќе се подготвуваат во Министерството, ќе бидат вметнати истите одредби, бидејќи тие не се ниту новина ниту желба на Министерството, туку европски директиви кои мора да ги следиме“, рече министерот за транспорт.

Според образложението од Уставен суд, причина за укинувањето на некои членови е постоењето законски механизам за наплата на јавните давачки и придонеси. Поради тоа, неплаќањето на даноците и придонесите не може да се предвидува како посебен услов за вршење дејност, бидејќи со тоа се повредуваат други вредности на граѓанинот, како што е достапност на секое работно место на секого под еднакви услови, слободен избор на вработување или право на работа. (С.Н.)