Скопјани осомничени за фалсификување платежни картички

Полицијата поднесе кривична пријава за две лица од Скопје за сторено дело - употреба на фалсификувани платежни картички, со кои купувале техника. Според скопската полиција, осомничениот Б.К. (29), во јуни минатата година, преправил две фалсификувани платежни картички и потоа ги употребил како вистински заедно со својот пријател Г.К.(29).

Првопријавениот на својата оригинална платежна картичка, издадена од една домашна банка, како и на уште една фалсификувана платежна картичка им вметнал податоци од други картички, сопственост на странски државјани, кои ги обезбедил нелегално. Со овие картички двајцата пријатели купувале техничка стока во повеќе скопски продавници. Тие успеале да извршат девет успешни трансакции во вредност околу 162.000 денари, но и исто толку неуспешни трансакции, во износ околу 356.000 денари. (Љ.С.)