Партали врз овошјето и зеленчукот на пазарите

Пазарџиите воопшто не размислуваат за хигиената на производите

Снежана Калабакова

Тезгиња покриени со ќебиња, весници, најлони, јамболлии и черги на крајот од пазарниот ден. А под разните партали се оставаат домати, пиперки, краставици, сливи, грозје... се' што се продава на зелените пазари. Грда слика од сите пазари во градов, без исклучок, којашто очигледно ја забележуваат единствено граѓаните.

„Тотално нехигиенски. Кога ќе видиш со што се покриени производите, да ти се згади. Не сфаќам, и онака ќебињата не можат да ја заштитат стоката од евентуални крадци, а да не говорам дека има и глувци на пазарите. Човек да не помисли да купи нешто од тезга“, вели една граѓанка, која купува на пазарот „Буњаковец“.

Гледаат ли одговорните како се чуваат производите на пазарите? Секојдневната слика само ја потврдува целосната неодговорност на надлежните инспекции, бидејќи, факт е ова се повторува со години, а никој не реагира. И, додека пазарџиите воопшто не размислуваат дали и колку е хигиенски таквото чување на храната, оваа практика очигледно не ја забележуваат ниту од Дирекцијата за храна. Тие вината за проблемот ја префлаат на оние што стопанисуваат со зелените пазари, во случајов на „Скопски пазар“, кои требало ним да им го пријави несоодветното чување на прехранбените производи.

„Корисниците на тезги на зелените пазари не смеат да складираат производи на површините на тезгите по завршување на работното време на пазарите, затоа што правните субјекти што стопанисуваат со зелените пазари се должни да ја одржуваат хигиената на тезгите. Во спротивно, правниот субјект треба да го раскине договорот со корисникот на услуги и да ја извести Дирекцијата дека нивните корисници не ги исполнуваат законските обврски“, велат во Дирекцијата за храна и додаваат дека покривањето на зеленчукот и овошјето со ќебиња, или черги е причина за дополнително контаминирање на храната со различни агенси, што е спротивно на Законот за безбедност на храна. Оттаму не одговараат дали тие воопшто направиле некаква контрола на самото место и дали досега е констатирана појава на контаминирана храна поради несоодветно складирање на тезгите на пазарите.

Од проблемот се оградуваат и пазарните инспектори кои велат дека тие не се надлежни за тоа. Нивна одговорност се поседувањето документација за работа и легална продажба на производите. Од „Скопски пазар“, претпријатието кое управува со зелените пазари, вината за проблемот ја гледаат кај пазарџиите кои ја оставаат стоката изложена и само покриена со партали, иако секоја тезга има магацински простор во долниот дел во кој би требало да ги складираат производите на крајот на работниот ден.

Најголем дел од пазарџиите не сакаат да зборуваат јавно. Само некои признаваат дека им е полесно да ги остават производите на тезга, иако ризикуваат да им бидат украдени. На тој начин утредента кога пазарот се отвора, не губат време на прередување на производите.

„Отвораме рано наутро и немаме време да прередуваме, туку само дополнуваме и почнуваме со продажба. Ако производите ги прередуваме, а продавам домати, тогаш брзо ќе омекнат и скапуваат. Не може да се префаќа секој ден производ што брзо калира“, вели Дара Пешевска, продавачка на пазарот „Буњаковец“.

Од „Скопски пазар“ најавуваат поставување нови и пософистицирани тезгиња на сите градски зелени пазари, изработени од алуминиум.

„Тешко дека можеме да измислиме поинакви тезги од постојните, бидејќи такви се тезгињата на зелените пазари на Балканот. При нашите посети на пазарите во други земји како Бугарија, Грција, Србија, Словенија, Хрватска, Италија не забележавме нешто што укажува на фактот дека заостануваме. Напротив, нашата констатација по овие посети е дека имаме едни од најдобро уредените и организирани пазари во регионот, со што се согласуваат и нашите колеги од соседните земји“, тврди Саше Давитковски, генерален директор на „Скопски пазар“.

Во претпријатието се прават обиди тезгињата да се модернизираат, за што постои соработка со студентите од Архитектонскиот факултет. Пластичните модели што ги искршиле пазарџиите на зелениот пазар во Ѓорче ��етров биле токму идеја на студентите. „Скопски пазар“ најавува дека за дваесетина дена ќе поставува нови тезгиња на пазарите, почнувајќи со Зелено пазарче, каде што ќе бидат заменети стотина тезги. Новите модели, вели Давитковски, имаат плотна што се подига и овозможува подобро изложување на производите, а имаат и подобро решение на магацините.