Насловна

Минивоинот дојава во грчките медиуми

Новата скулптура на Александар Македонски од скопскиот аеродром дојава вчера во грчките медиуми, предизвикувајќи бурни реакции на грчките блогови. Поставувањето миниверзија на воинот на коњ на аеродромот „Александар Македонски“, каде што по преименувањето не стапнал грчки политичар, беше протолкувано како продолжение на македонските провокации со скулптури на Александар и Филип Втори. Дел од нив поставувањето ваква скулптура на аеродромот го протолкуваа како турски подарок за Македонија, но, главно, беше оценет како уште една од многубројните отровни стрелички кон Грција. Блогерите коментираат дека колку што е негативна постапката од македонска страна, толку е полошо што нема официјални реакции од грчката влада за „злоупотребувањето на ��рчката историја“. Не изостанаа ни коментари дека ваквите споменици воопшто не и' помагаат на економската состојба и на високиот степен на невработеноста во државата.

За разлика од медиумите и блогерите, грчките политичари вчера останаа без коментари. По подигнувањето на „Воинот на коњ“, во почетокот на летото грчкото МНР забележа дека ваквите постапки не се конструктивни, а новиот шеф на грчката дипломатија во првите обраќања до нашата држава апелираше дека треба да се градат мостови за соработка, а не ѕидови и споменици. (М.П.)