10.06.2013, 15:33 Обрван: Швајцарците посилни од Португалците
Македонија во среда во Цирих ќе оди на победа за останување во трката за пласман на ЕП 2014 во Данска
Најдобрите македонски ракометари утре патуваат за Цирих, каде што во среда од 20 часот во Цирих ќе одат на победа над Швајцарија за останување во трката за Европското првенство 2014 во Данска. И��ко беше убедливо совладан со 30:24 во Скопје на стартот од натпреварите во првата квалификациска група, ривалот не е наивен бидејќи и' откина бод на второпласирана Португалија, кој ги одржа во живот „црвено-жолтите“. Оттаму и заедничкиот став на селекторот Ивица Обрван и на капитенот Кирил Лазаров дека Швајцарците се посилни од Португалците.
„Станува збор за селекција со две лица - едно на гостински терен и друго дома. Тоа го покажаа и во Скопје, кога лесно изгубија, но тоа нема да ги спречи на свој терен да дадат се' од себе за подобар резултат што носи коефициент со кој би ги избегнале претквалификациите во наредниот циклус. И јас мислам дека тие се поквалитетна екипа од Португалија и оти не' чека тешка задача во Цирих, но јас сум оптимист и уверен сум дека ние имаме одговор на нивната игра и поголем мотив, кој ќе ни биде водилка за да направиме позитивен резултат“, вели Хрватот на македонската клупа.
„Останувам на тоа дека Швајцарија е многу поквалитетна репрезентација од Португалија и не' очекува тешка работа таму. Меѓутоа, во ниеден сегмент од играта не заостануваме зад Швајцарците, напротив. Многу подобри сме и тимски и поединечно, имаме и поширок избор на играчи, така што се' ни оди во прилог. Подготвени сме, а има и најави дека ќе играме пред 700-800 наши навивачи, па ќе се чувствуваме како на домашен терен“.
По завршувањето на Бундес-лигата, во која и покрај поразот во последното коло Гумерзбах избори опстанок, Борко Ристовски се приклучи на националниот тим, во кој се враќа по пропуштениот реванш со Шпанците во Гвадалахара. Наумче Мојсовски и Филип Миркуловски, кои влечеа повреди во завршницата од првенствената сезона, се многу подобро и Обрван ќе може да смета на нив во Цирих. (Р.Д.)
|
