На завршување на Коридорот 10 ќе се изначекаме

Делницата Демир Капија - Смоквица, долга 28 километри, е во фаза на изведбен проект

Билјана Ангеловска

„Македонија и Србија треба да го искористат интересот на големите европски индустриски гранки за селење на капиталот во близина на Коридорот 10 за да ги привлечат во што поголем број. Затоа е важно да го завршат Коридорот во планираниот рок до 2012 година“. Ова го рече вицепремиерот на Србија, Млаѓан Динкиќ, на средбата со македонскиот заменик-претседател задолжен за економски прашања, Владимир Пешевски.

И додека српската страна планира да го искористи тој бран на емигрирање на инвеститорите и интензивно  работи на завршување на Коридорот 10, во Македонија сигурно нема да може да биде запазен рокот до 2012 година. Засега е извесно дека до крајот на годинава би требало да заврши изградбата на автопатот Табановце - Куманово, седум километри долгата делница од К-10, додека делницата Демир Капија - Смоквица е далеку од такво нешто, бидејќи се' уште не е ни почната да се гради, а според сите проекции, нејзината изградба ќе трае барем четири години. Стартот на реализацијата на овој проект доцни и поради одлуката на Грција да го повлече своето учество во финансирањето на проектот со 50 милиони евра, по што македонската Влада обезбеди 5 милиони евра, а Агенцијата за државни патишта ги искористи средствата за изработка на проектот.

„Изведбениот проект за изградба на нова автопатска делница од Демир Капија до Смоквица во должина од 28,1 километар како дел од Коридорот 10 е во финална фаза и се наоѓа на ревизија на Градежниот факултет. Забрзано се врши експропријација на земјиштето. Паралелно со овие активности се работи и на подготовка на тендерската документација, а по завршувањето на сите постапки е предвидено во март 2011 година веќе да имаме избрано изведувач на градежните работи“, вели за „Утрински“ Наташа Валкановска, директорка на Агенцијата за државни патишта.

Освен податокот дека изградбата на оваа делница од автопатот, кој е дел од Паневропскиот коридор 10 ќе чини околу 250 милиони евра, не добивме одговор од каде државата ќе ги обезбеди тие средства, како ни тоа каде ќе минува трасата, дали покрај пругата или на друга страна. Во минатиот јули министерот за финансии, Зоран Ставрески, најави дека проектот за довршување на автопатот ќе биде првиот што ќе се финансира од 40 милиони евра обезбедени од ИПА-фондовите и 38 милиони евра алоцирани за кофинансирање.

За разлика од Македонија, во соседна Србија интензивно се гради автопатот, кој го поврзува Балканот со Европа. Така, во овој период наредната година, според најавите на Динкиќ, би требало веќе да се вози по новоизградената делница низ Војводина, додека делот од Коридорот, кој ја поврзува Србија со Македонија, од Лесковац до македонската граница, се планира да биде завршен до 2012 година. (Б.А.)