Сведоците на МВР не се појавија

БИТОЛА - Главните сведоци во судскиот процес што го води МВР против фармерите од „Сведмилк“ за минатогодишниот упад во кабинетот на градоначалникот Владимир Талески никако да се појават во судот во Битола. И вчера рочиштето помина само со сведочење на неколкумина полициски службеници.

„Судскиот процес без сведоците на тужителот МВР станува маратонски. Целта е врз нас да се вршат притисоци“, обвинуваат фармерите на „Сведмилк“ од Пелагонија по неколкуте одржани судски рочишта. Дваесет и шест од нив се најдоа на обвинителна клупа како наводни организатори на масовниот протест што се одржа лани летото токму во зградата на Општината. Тогаш фармерите, на изненадување и на полицијата, упаднаа во кабинетот на градоначалникот Владимир Талески, барајќи посредување со Владата за решавање на нивниот проблем со неисплатеното млеко. Кооперантите се' уште побаруваат 4 милиони евра за предаденото млеко во шведската млекарница.

„Иако уредно поканети на рочиштето, не се појавија градоначалниците на Битола и на Могила, пратеникот Никола Котевски и тогашниот министер во Владата, Кристијан Делев. Значи, се срамат да излезат пред нас, млекопроизводителите. Ова судење е под притисок на Владата, за да се одолжува и за да не се расчисти криминалот во ‘Сведмилк‘“, изјави Душко Илиевски, водач на фармерите и еден од обвинетите.(А.Б.)