Едицијата руски култни дела почнува со „Ана Каренина“

Новоизградениот музеј посветен на Толстој во селото Старогладовскаја, каде што некогаш живееше писателот

Новиот проект на „Утрински весник“,„Дневник“ и на „Вест“, кој ќе се осврне на руските дела што оставија силен печат во европската и во светска книжевност, почнува со првиот дел на една од најпровокативните љубовни приказни, „Ана Каренина“ на Лев Николаевич Толстој. Вториот дел читателите ќе го добијат веќе во среда и веднаш потоа, секоја наредна среда се' до 25 август ќе објавиме уште девет врвни дела на најголемите руски автори.

Во луксузно пакување, со висок квалитет, освежени и современи изданија на некои од вечните романи, како „Капетановата ќерка“ на Пушкин, „Песјо срце“ на Булгаков, „Татковци и деца“ на Тургењев и на драмите „Ревизор“ на Гогољ или „Вишновата градина“ на Чехов. Во текот на јуни до читателите ќе стигнат Пушкин и Булгаков, а за јули се предвидени „На дното“ од Максим Горки, „Ревизор“, „Ние“ на Замјатин и првиот дел на „Во првиот круг“ од Солжењицин. Оваа ексклузивна понуда на бесмртните дела, кои се добредојдени за сечија библиотека, а кои ќе чинат само 249 денари и нема да бидат врзани со купување и на еден од дневните весници (освен првиот), ќе се затвори со „Вишновата градина“, со „Татковци и деца“ и со драмите на Островски „Шума“ и „Мома без мираз“.

Но, не случајно започнуваме токму со Толстој. Бидејќи, тој е столбот, неговите дела извршија големо влијание на европската и на светска книжевност. Тој го достигна врвот на рускиот реализам и се сметаше за еден од најсилните општествени аналитичари, кој умееше својата критика кон општеството и институциите да ја спои со интимното и психолошкото.

Романите на Пушкин, пак, се сметаа за претходница на руската реалистичка проза. Тој беше романтичар, кој смело ги уриваше класичните норми. Додека драмите на Чехов го претворија во зачетник на модерната драматургија, со кој се отвори еден нов период во светската драмска уметност.

Во средината на 19 век А.Н. Островски со своите драми го создавал рускиот национален театарски репертоар, во истиот период И.С. Тургењев пишувал за „одвишните луѓе“ – чести карактери во романите на рускиот реализам, а додека на почетокот на 20 век М.Горки важел за творец на моделот на социјалистичкиот реализам, дотогаш драматичарот М. Булгаков, кој во 1930-тите отстапувал токму од овој тогаш доминантен модел, бил игнориран, па неговите дела се објавени посмртно.

Гогољ, како и Толстој, беше претставник на рускиот реализам, кој нагласено ги критикуваше општествените состојби, а Замјатин и Солжењицин поради нивната смелост и жестока критика беа прогонети од својата земја. Сите овие исклучителни дела, и книжевни и историски сведоци, кои во нашата земја биле издадени одамна, а некои од нив и никогаш, сега ќе бидат повторно понудени на нашиот пазар. Овие книги со современ дизајн ќе бидат печатени во Италија и подготвени со најнова јазична обработка. (С.У.)