Љубе Бошкоски не примил обвинение, а му е продолжен притворот

Од партијата Обединети за Македонија, чиј лидер Љубе Бошкоски од 6 јуни е на издржување на мерката притвор, обвинија дека случајот што се води против него е монтиран процес.

Наталија Ивчева, член на потесното партиско раководство, обвини дека претседателката на скопскиот Кривичен суд, Лидија Неделкова, зад затворени врати му го продолжила притворот на Бошкоски за уште еден месец и дека, и покрај најавите оти било изготвено и дистрибуирано обвинение, актот го нема примено ниту обвинетиот ниту неговите бранители. Во ОМ се сомневаат дека Кривичниот суд можеби веќе има и готова пресуда за Бошкоски.

„Поминаа три месеци од нечовечкото апсење на лидерот на Обединети за Македонија, господинот Љубе Бошкоски, а досега нема официјални информации за оправданоста на ваквиот чин на власта“, изјави Наталија Ивчева на вчерашната прес-конференција.

Од ОМ беа упатени обвинувања и на сметка на премиерот Никола Груевски, за кого беше кажано дека своите неистомисленици или ги апси или ги лустрира, а дека им инфилтрира луѓе со цел да го преземе раководењето во партијата.

Лидерот на ОМ беше уапсен и притворен само еден ден по одржувањето на парламентарните избори. Бошкоски се товари дека во ресторанот „Воденица“ примил 100.000 евра од познато лице и дека со тие пари требало да ја финансира изборната кампања на својата партија. (Љ.С.)