Тројца скопјани изработувале фалсификувани платежни картички

Центарот за спречување организиран и сериозен криминал при Единицата за компјутерски криминал поднесе кривична пријава против Д.И. (39) поради сомнеж дека сторил кривично дело правење, набавување или отуѓување средства за фалсификување, а за лицата Д.Ц. (40) и Н.И. (36) за дела изработка и употреба на лажна платежна картичка и за соизвршителство.

Според МВР, во периодот од окт��мври минатата година до мај оваа година првопријавениот, со цел да се стекне со противправна имотна корист, неовластено прибавил опрема за изработка на лажни платежни картички, како и лични податоци на носители на платежни картички, а потоа со другите двајца ги користеле како вистински. Тие ги употребиле фалсификуваните платежни картички при вршење нелегални трансакции на ПОС-терминалите на неколку банки и на повеќе продажни места во Скопје. Со употребата на картичките, осомничените извршиле пет нелегални успешни трансакции во вкупен износ од 22.890 денари и осум неуспешни нелегални трансакции во вкупен износ од 65.160 денари при купување трговска стока на повеќе продажни места во Скопје.

Првоосомничениот во мај годинава бил кривично пријавен и за кривично дело помагање во врска со кривично дело правење, набавување или отуѓување средства за фалсификување, како и за изработка и употреба на лажна платежна картичка. Имено, при претрес на домот на Д.И., полицијата открила работилница со специјализирани уреди и опрема за изработка на платежни картички. (Љ.С.)