Седум семејства живеат под отворено небо

Две недели по пожарот во кој им изгореа куќите со целата покуќнина, 27 члена на седум прилепски семејства од населбата Тризла живеат под отворено небо. Без пари, без храна, без елементарни услови за живот и без никаква помош, овие граѓани од ромска националност се борат со животот. Децата велат им се разболеле по пожарот, добиле труење, а од тогаш немаат ни чаша млеко да им дадат, да ги избањаат и да ги облечат во чиста облека. Н��маат никакви услови за одржување на хигиената. Разурнатите куќи до темел и целата околина личат повеќе на депонии, кои се потенцијални извори на инфекција. Но, излез немаат. Помошта што им била ветена од локалната самоуправа досега не ја добиле. Сега се наоѓаат во безизлез, бараат и молат итно да им се помогне.

Од локалната самоуправа нема одговор, а од Центарот за социјална работа најавуваат дека дури во текот на идната недела ќе се состане надлежната комисија за да ги разгледа нивните барања.

„Немаме пари, храна, млеко да им купиме на децата. Гладуваат по цели денови. А како-така пред пожарот си правевме план и живеевме, си куќевме куќи сите. Сега останавме и голи и боси, без покрив, ете така на земја спиеме, никој не дошол да не' види, да не' праша како ни е, дали ни треба нешто“, се жали Џевџед Мустафоски, кој е глава на 10-члено семејство, во кое никој не е вработен.

И неговата снаа Фердита Исмаилоска плаче од болка зашто нема каде да ги згрижи своите деца. Вели, гладуваат со денови, плачат, а тие немаат можност да им дадат храна, бидејќи пламените јазици пеплосале се' што имале зачувано. Таа е исплашена за здравјето на своите деца, кои кобниот ден кога избувнал пожар, добиле труење од чадот.

Ајнур Мустафоски тврди дека побарале да им се донесе некоја интервентна помош додека не се да снајдат, но без успех. „Побарав шатори за да спиеме во нив, не ни дадоа. Побарав ќебиња, не добив, побаравме булдожер за да се израмни целиот терен и да се тргнат шутот и целото ѓубре, пак џабе, ни пратија само еден контејнер да се собира отпадот. Но, овде се' е отпад. Живееме мизерно“, вели Мустафоски.

Согласно со законот, во услови на елементарни непогоди на настраданите семејства им следува максимална парична помош до 30.000 денари, но колку пари ќе добијат и кога, засега не се знае. А за семејствата секој час е скапоцен оти буквално живеат на улица. (Mн.Т.)