Нови кредити за земјоделците од Шпаркасе

Шпаркасе банка воведува нови кредити за развој и поддршка на земјоделството. Според намената, кредитните износи ќе се движат до 100.000 евра за примарно производство, до 500.000 евра за преработка на земјоделски производи и до 200.000 евра за трговија со земјоделски производи. За откуп и за преработка на грозје, велат од Шпаркасе банка, ќе може да обезбеди кредитен износ и до 700.000 евра. Каматната стапка за кредитите со девизна клаузула ќе се движи од четири до пет отсто. За девизните кредити од сопствени средства на банката, каматната стапка изнесува 8,45 отсто, додека за денарските кредити каматата е 13 отсто. „За отплата на кредитите се предвидени од четири до седум години, и грејс-период до 3 години, со цел отплатата да почне по стекнувањето на првите приноси од инвестицијата. Кредитите се обезбедени од сопствени средства на банката и од земјоделскиот кредитен дисконтен фонд на Македонската банка за поддршка на развојот“, велат од Шпаркасе банка. Оттаму информираат дека тие ќе бидат присутни со свој штанд на претстојниот саем „АГРОФУД 2010“ за да им ги доближат на земјоделците овие кредити. (Ек.Р.)