Почна судењето за обидот за убиство на синот на Рафиз Алити

Десетмина членови на семејството Сали се обвинети за јулскиот напад во Радуша

Дури десетмина припадници на семејството Сали од скопското село Радуша се обвинети за пукањето што се случи на 3 јули годинава, кога беа ранети повеќе лица. За пукањето во Радуша, петмина од семејството Сали се товарат за убиство во обид, а сите десетмина за тешки дела против општата сигурност.

Во Основниот суд Скопје 1 вчера беа спроведени сите десетмина обвинети од истражниот затвор „Скопје“. На обвинителна клупа во судницата седнаа Реџеп Сали (33), неговиот брат Кенан (23) и нивниот татко Меџит (57), потоа браќата на Меџит - Џељал (50) и Сељим (53), Хотип Сали (44), Емин Сали (27), Гадаф Сали (21), Аднан Сали (26) и Ведат Сали (28).

Според Јавното обвинителство -Скопје настанот случил на 3 јули оваа година во 23,40 часот кога од огнено оружје бил нападнат Бесфорд Алити, син на пратеникот Рафиз Алити. Според Обвинителството, припадниците на семејството Сали, со две возила ги блокирале двете главни улици кои воделе кон центарот на Радуша, а потоа од разни оружја стрелале во Бесфорд, кој седел на скалите пред колонијалната продавница. Тој најпрво се скрил зад едно возило, но кога повторно се обидел да побегне, бил погоден во телото и екстремитетите. Откако нападнатиот успеал да се скрие во една од селските куќи, напаѓачите својот револт го насочиле кон нивните соселани кои биле пред, но и во кафе-барот „Вита“. Во нападот, во кој било користено и автоматско оружје, кое е забрането за цивили, биле ранети уште седуммина други жители на Радуша.

На вчерашниот распит, првообвинетиот Реџеп Сали вината ја префрли кај оштетениот Бесфорд. Имено, тој рече дека критичната вечер, откако се вратил од базен, ја зел ловџиската пушка и батериската ламба се упатил на лов на диви свињи, но кога стигнал сред село, слушнал како едно лице му вика на Бесфорд дека треба да пука кон него. Првообвиниетиот не кажа за каква ловџиска пушка станува збор, но рече дека таа има магацин за 30 куршуми и дека во 2001 година ја добил лично од Рафиз Алити, а дека во времето на „жетвата“ од него бил советуван да не го предава оружјето. Според Реџеп Сали, кон него било стрелано од пиштол, од ловџиска и автоматска пушка, а дека кога бил пред кафулето и тој го извадил оружјето и стрелал во самоодбрана. Обвинетиот смета дека доколку на помош не му дошол татко му, тешко дека ќе можел да се извлече од ситуацијата во која се нашол не по своја вина.

Судењето продолжи со распит и на другите членови на семејството Сали, а според предвидувањата, судот ќе ги распита оштетените кон средината на ид��иот месец за кога е закажано следното рочиште. (Љ.С.)