Аеродромци ќе спортуваат гратис само за викенд

Општината ќе ги издаде терените на закупци за минимум 100 евра

Деспина Трајковска


Аеродромци само преку викенд ќе можат бесплатно да играат тенис или фудбал на игралиштата што им ги (из)гради Агенцијата за млади и спорт заедно со Општината. Преку недела ќе можат да спортуваат само доколку остане слободен термин, но, сепак, за тоа ќе треба да платат. Со игралиштата наместо Општината, ќе менаџираат закупци, кои за терените ќе и' плаќаат на Општината минимум 100 евра месечно.

Иако ваквиот начин на менаџирање на спортските терени се разликува од првичните најави дека граѓаните во секое време ќе можат бесплатно да спортуваат, вчера се очекуваше идејата да биде визирана од Советот на Општина Аеродром. Според градоначалникот Ивица Коневски, не станува збор за изигрување на граѓаните. Напротив, тој смета дека тие ќе имаат можност да ги почувствуваат бенефитите од проектот.

„Ова е правилник што мора да се усвои за да има ред на игралиштата. Нормално е тие да имаат закупци што ќе имаат обврска да ги одржуваат терените во секој поглед, а со цел граѓаните да не бидат изиграни, закупците од наша страна ќе бидат обврзани да даваат бесплатни термини за сите жители што ќе имаат желба да играат тенис, фудбал и слично“, вели Коневски.

Според неговата математика, сите аеродромци ќе можат да спортуваат бесплатно, и помладите и постарите. Закупецот ќе има обврска преку неделата да отстапи бесплатни термини за училиштата и за градинките, а викендите да ги резервира за заинтересираните групи граѓани. Коневски појаснува дека ако се собере бројот на резервирани термини, кои Општината ќе им ги наложела на закупците, тие, практично, ќе имале сосема малку слободни термини за издавање на терените за пари.

Ваквиот начин на функционирање на игралиштата ќе важи за сите оние што ги гради Агенцијата за млади и спорт во Аеродром. Наскоро одлуката ќе почне практично да се применува на веќе изградените две тениски игралишта во близина на спортската сала „Јане Сандански“, како и на двата фудбалски терена, едниот кај салата, а другиот во Реонски центар, кој се во завршна фаза на изградба.

Според објаснувањето на општинарите, со терените ќе менаџира заинтересиран закупец што ќе се избере преку лицитација. Тој ќе треба да и' плаќа на Општината минимум 100 евра месечно, цена што, сепак, ќе се утврди на јавното наддавање. Закупецот ќе има обврска тековно и инвестиционо да го одржува теренот, а ќе мора и да го осигури од секаков вид штети. На ваков начин се очекува да функционираат сите игралишта што се градат низ државава како дел од проектите на Агенцијата за млади и спорт за изградба на спортски терени.