Кредит за три нови „пајаци“

Пајак-службата сега располага со шест возила, од кои три се стари речиси дваесетина години

Јавното претпријатие „Градски паркинг“ ќе се подновува со три нови „пајаци“. Од претпријатието планираат да земат кредит за набавка на новите возила, за кои, според процените, ќе им бидат потребни околу 300.000 евра. Причината за поднова на возниот парк е да може да се интервенира низ сите општини во градот, а истовремено и да им се олесни работата, имајќи предвид дека „пајаците“ им се потребни и за подигање на возилата што не го почитуваат времето за паркирање во рамките на зонскиот систем на наплата.

Според Борче Јакимовски, директор на „Градски паркинг“, кредитот нема да го оптовари буџетот на претпријатието оти тоа сега не е кредитно задолжено, неодамна ја исплатило и последната рата за трите „пајака“, кои ги набави пред речиси три години.

„Од друга страна, многу поисплатливо ни е да исплаќаме рати за кредит отколку да ги трошиме парите за сервисирање на постојните возила. Колку за споредба, месечно имаме околу 300.000 денари расход за поправка на ’пајаците‘, а приближно толку би плаќале рата за планираниот заем“, вели Јакимовски, кој наскоро ќе распише повик за набавка на возилата за најдоцна до лето да почнат да интеревнираат на терен.

Надлежните велат дека со овие три нови пајаци во голема мера ќе се засили нивното присуство на улиците, па ќе можеле да интервенираат не само во строгиот центар на градот, туку и во другите општини каде што има проблеми со узурпирање на јавите површини.

Пајак-службата сега располага со шест „пајаци“, од кои три се купени пред речиси три години, а останатите три се стари дваесетина години. (Дс.Т.)