Македонец фатен со два килограма хероин

Припадниците на полицијата и на царината на граничниот премин Хоргош, спречиле обид за шверц на два килограма хероин. Како што јавуваат српските медиуми, дрогата била одземена од македонскиот државјанин Стојче С., кој патувал со бугарска компанија на релација Варна - Инсбрук.

Според српската Царина, македонскиот државјанин го криел хероинот во медицински појас, односно во четири пакувања со тежина од по 500 грама. Тој бил детектиран од вработен во Царината, кој од македонскиот државјанин побарал да го провери. При проверката, кај Стојче С. бил откриен хероинот што бил спакуван во медицинскиот појас. Осомничениот не криел дека шверцувал наркотици, а според неговото признание, за успешно завршената работа му била ветена награда од 3.800 евра. (Љ.С.)